Advertisement 1
सुरक्षा सम्बादाता ११ पुस २०८१ काठमाडौं; नेपाल सरकारका प्रवक्ता एवं सञ्चार तथा सूचना प्रविधिमन्त्री पृथ्वीसुब्बा गुरुङले नेत्रविक्रम चन्द विप्लव नेतृत्वको नेपाल कम्युनिस्ट पार्टीसँगको सहमति तलमाथि नभएको बताएका छन् ।
पुस ९ गते बसेको मन्त्रिपरिषद् बैठकको निर्णय सार्वजनिक गर्न बिहीबार आयोजित पत्रकार सम्मेलनमा बोल्दै मन्त्री गुरुङले विप्लवसँग भएको ३ बुँदे सहमति तलमाथि नभएको बताएका हुन् ।
Advertisement 2
‘विप्लवले के भने मलाई थाहा भएन । केही नेपाल ऐन संशोधनमा हामीले केही सहकारीसँग जोडिएका तीन/चारवटा ऐनहरूलाई एकीकृत गरेर त्यसलाई संशोधन गर्ने र संसदीय प्रतिवेदन समितिले सुझाव दिएका विषयलाई पनि समावेश गरेर अहिले हामीले नयाँ ऐन बनाएको हो,’ प्रवक्ता गुरुङले भने ।
Advertisement 3
तत्कालीन केपी शर्मा ओली नेतृत्वको सरकारसँग २० फागुन २०७७ मा ३ बुँदे सहमति गरेर विप्लव नेतृत्वको पार्टी हिंसात्मक भूमिगत राजनीति त्यागेर शान्तिपूर्ण राजनीतिमा आएको थियो । उक्त सहमतिमा नेता–कार्यकर्तालाई लागेका मुद्दा सरकारले फिर्ता लिने उल्लेख छ ।
यो सहमति कार्यान्वयन गर्न भनेर ल्याइएको केही नेपाल ऐन संशोधन विधेयकको एउटा प्रस्तावित व्यवस्थाबाट सरकार पछि हट्न लागेको भनेर विप्लवले असन्तुष्टि जनाउँदै आएका छन् ।
विप्लव र सिके राउत नेतृत्वको पार्टीसँग विगतमा भएको सहमति कार्यान्वयन गर्न तत्कालीन कानुन, न्याय तथा संसदीय मामिलामन्त्री धनराज गुरुङले २०८० वैशाखमा केही नेपाल ऐन संशोधन विधेयक ल्याएका थिए ।
उक्त विधेयकको दफा ६४ मा यससम्बन्धी व्यवस्था छ । जहाँ सशस्त्र द्वन्द्व वा भूमिगत रहेको राजनीतिक शक्ति शान्तिपूर्ण राजनीतिमा आए जुनसुकै अदालतको जुनसुकै तहमा रहेको मुद्दा फिर्ता लिनसक्ने व्यवस्था प्रस्तावित छ ।
यो व्यवस्थाको दुरुपयोग हुन्छ भनेर सार्वजनिक रुपमा विरोध हुँदै आएको छ । त्यही विरोधलाई आधार मानेर सरकारले केही नेपाल ऐनको दफा ६४ फिर्ता लिने घोषणा गरेको छ ।
कानुन, न्याय तथा संसदीय मामिलामन्त्री अजयकुमार चौरसियाको यस्तो घोषणापछि विप्लवले विज्ञप्ति नै निकालेर असन्तुष्टि जनाएका छन् ।
‘केपी शर्मा ओली नेतृत्वको सरकार आफैंले विगतमा गरेको निर्णय कार्यान्वयन गर्नुको सट्टा राजनीतिक सहमतिबाट राज्य आफैं पछाडि फर्किन, छलछाम र षड्यन्त्रबाट गुज्रन खोजेको प्रष्ट भएको छ,’ महासचिव विप्लवले भनेका छन् ।
विप्लवको यस्तो प्रतिक्रियापछि नेपाल सरकारका प्रवक्ताले ३ बुँदे सहमति तलमाथि नभएको बताएका हुन् ।
