सुरक्षा सम्बादाता १३ फागुन २०८१ काठमाडौं । नेपाल प्रहरीको लागुऔषध नियन्त्रण ब्युरोको टोलीले सोमबार दुईजनालाई सार्वजनिक गर्यो ।
ठूलो मात्रामा लागुऔषध ट्रामाडोलसहित पक्राउ परेका ललितपुुरका ३३ वर्षीय सुधीर लामिछाने र पर्साका ३८ वर्षीय साइमन बनवारीलाई सार्वजनिक गरेको हो ।
उनीहरू दुवैजनामाथि ब्युरोको टोलीले लागुऔषध मुद्दामा अनुसन्धान अघि बढाएको जनाएको छ । सुधीरलाई गएको बिहीबार ललितपुरबाट ट्रामाडोलसहित पक्राउ गरिएको थियो । उनीमाथि अनुसन्धान गर्दै जाँदा साइमनको संलग्नता देखिएपछि उनलाई पनि पक्राउ गरिएको प्रहरीले बताएको छ।
सुधीर र साइमनले लागुऔषध ट्रामाडोल राख्न गोदाम भाडामा लिएका थिए । ब्युरोको टोलीले उनीहरूको गोदाममै छापा मारेर पाँच लाख ६४ हजार १०० क्याप्सुल बरामद गरेको हो । ब्युरोको टोलीले एकसाथ यति धेरै मात्रामा ट्रामाडोल बरामद गरेको यो नै पहिलोपल्ट भएको बताएको छ।
प्रहरीका अनुसार, उनीहरूले भारतबाट तस्करी गरेर ल्याएको ट्रामाडोल काठमाडौंमा बिक्री–वितरण गर्दै आएका थिए ।
Advertisement 1
सुधीर फार्मेसी सञ्चालक रहेको प्रहरीले जनाएको छ। सुधीरका साथबाट प्रहरीले ३० हजार क्याप्सुल बरामद गरेको थियो । थप अनुसन्धान गर्दै जाँदा प्रहरी साइमनको गोदामसम्म पुगेको थियो । साइमनको गोदामबाट ब्युरोको टोलीले पाँच लाख ३४ हजार १०० क्याप्सुल बरामद गर्यो ।
काठमाडौंको चन्डोलमा सुधीरको आफ्नै फार्मेसी समेत रहेको प्रहरी अनुसन्धानका क्रममा खुलेको छ । फार्मेसीबाट उनले ट्रामाडोल बिक्री गर्ने गरेका थिए । सुधीरले लामो समयदेखि ट्रामाडोलको कारोबार गर्दै आएको खुलेको प्रहरीले जनाएको छ ।
साइमन भने लागुऔषध कारोबारी भएको प्रहरीले जनाएको छ । उनी पर्सा हुँदै काठमाडौंलाई आधार बनाएर लागुऔषध तस्करीमा लागेको प्रहरीको प्रारम्भिक अनुसन्धानका क्रममा थाहा भएको छ । ट्रामाडोलबाहेक अरू लागुऔषध कारोबारमा समेत उनीहरूको संलग्नताबारे प्रहरीले अनुसन्धान थालेको छ ।
Advertisement 2
गएको आर्थिक वर्ष २०८०/२०८१ मा मात्र ब्युरोले आठ किलो र काठमाडौं प्रहरीको टोलीले ६ किलो कोकिन बरामद गरेको उपत्यका प्रहरी कार्यालयले जनाएको छ ।
Advertisement 3
