२७ फागुन २०८१ काठमाडौं । नेपाल प्रहरीमा वृत्ति विकासका लागि कोशेढुंगा मानिएको स्टाफ कलेज (एमपीएस) को प्रवेश परीक्षा आगामी साता तयारी भइरहेको छ ।स्टाफ कलेज गरेकालाई मात्र प्रहरीको नेतृत्व तहमा लैजाने उदेश्यले सुरु गर्न लागिएको यो कार्यक्रम असफल बनाउन प्रहरी अधिकारी नै लागेका छन् ।स्टाफ कलेजको प्रवेश परीक्षा समेत रोक्न माग गर्दै २० जना डीएसपीहरुले सोमबार सर्वोच्च अदालतमा रिट दायर गरेका छन् ।डीएसपी रिपेन्द्र कुमारसहितका २० डीएसपीले सोमबार रिट दर्ता गराएका हुन् । जसमा मंगलबार नै पेशी तोकिएको छ ।२०७० सालको चैतमा भर्ना भएको इन्सपेक्टरको ब्याचबाट स्टाफ कलेज गर्न लागिएको छ । कानुनमै नभएको स्टाफ कलेज रोक्न माग गर्दै केही अधिकृतहरु संगठनविरुद्ध नै अदालतमा गएका हुन् ।

यसले नेपाल प्रहरीभित्रको चेन अफ कमाण्डको अवस्था कति कमजोर छ भन्ने प्रष्ट पारेको छ । स्टाफ कलेजमा क्षमतावान अधिकृतहरु मात्र सफल हुने निश्चित छ ।जसकारण राजनीतिक भनसुनका आधारमा सरुवा–बढुवा हुनेहरुको चलखेल धेरै हदसम्म रोकिनेछ । राजनीतिक शक्तिको आडमा चलखेल गर्दै आएका अधिकृतहरु रिट लिएर सर्वोच्च गएका हुन् ।उनीहरुले गृह मन्त्रालय, प्रहरी प्रधान कार्यालय, प्रहरी महानिरीक्षकको सचिवालय र स्टाफ कलेजलाई विपक्षी बनाएर रिट दायर गरेका छन् ।