०५ चैत २०८१ काठमाडौं । संसद्को ठुलो दल नेपाली कांग्रेसको समर्थनमा प्रधानमन्त्री बनेका नेकपा एमालेका अध्यक्ष केपी शर्मा ओली नेतृत्वको सरकार पूर्णतः असफल उन्मुख भएको छ ।

सरकारको कुशासनका कारण जनतामा असन्तुष्टि र आक्रोश तीव्र रूपमा बढ्दै गएको हो ।

जनतामा पैदा भएको असन्तुष्टिलाई धमिलो पानी बनाइ प्रतिगामी र पुनरुत्थानवादीहरू राजतन्त्र पुनस्र्थापनाको षडयन्त्रमा लागेका छन् । प्रधानमन्त्री केपी शर्मा ओलीको रवैया र गतिविधिलाई व्यवस्था विरोधले हतियार बनाएका छन् । गणतन्त्र स्थापना भएको १६ वर्षमा मुलुकलाई सही दिशा दिन नसक्दा व्यवस्था माथि नै प्रहार हुन थालेको छ । 

Advertisement 2

ओली सरकारको आठ महिनाको अवधिले कांग्रेस–एमाले गठबन्धनमाथि गम्भीर प्रश्न उठाएको छ । कांग्रेस र एमाले बिचको सात बुँदे सहमति केबल सत्ताका लागि मात्रै थियो भन्ने यो अवधिले पुष्टि गरिदिएको छ । कांग्रेसभित्र ओली सरकारको विकल्प खोज्नुपर्ने आवाज बाक्लिदै गएको छ भने यही बिचमा कांग्रेस सभापति शेरबहादुर देउवा र नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’बिचको कुराकानीलाई अर्थपूर्ण रूपमा हेरिएको छ ।

स्रोतका अनुसार देउवा र प्रचण्डबिच ओलीको विकल्प खोज्ने विषयमा छलफल भएको छ । देउवाको नेतृत्वमा सरकार गठनका लागि प्रचण्ड तयार भएका छन् । देउवाको नेतृत्वमा एमालेसहित सहमतिको सरकार गठनमा जोड दिने र ओली नमाने एमालेबाहेकको सरकार गठनसम्मको कुरा चलेको एक नेताले दाबी गरे ।

Advertisement 3

माओवादी महासचिव देव गुरुङले यस अगि पनि कांग्रेससँग सहकार्य हुन सक्ने संकेत गरेका छन् ।

प्रतिगामी शक्ति सलबलाएपछि हुलाकी राजमार्ग केन्द्रित अभियान स्थगित गरेर काठमाडौँ फर्किएका माओवादी अध्यक्ष प्रचण्ड गणतन्त्रवादी नेताहरूको छलफलमा व्यस्त छन् । त्यही क्रममा प्रचण्डले कांग्रेस सभापति देउवादेखि समाजवादी मोर्चाका शीर्ष नेता र अन्य दलका नेतासँग पनि कुराकानी गरेको स्रोतले बतायो ।

प्रचण्डले केही दिनअघि सरकारको अहंकारले लाखौँ जनता सडकमा आउने स्थितिमा पुग्ने चेतावनी दिएका थिए । माओवादी केन्द्र, एकीकृत समाजवादी, नेपाल समाजवादी पार्टी र नेकपा सम्मिलित चार दलीय समाजवादी मोर्चाले यही १५ गते काठमाडौंमा वृहत् जनप्रदर्शन गर्दै छ ।