सुरक्षा संवाददाता ०३ मंसिर २०८१ काठमाडौ ; सशस्त्र प्रहरी बल नेपाल (एपीएफ) र भारतको सशस्त्र सीमा बल (एसएसबी) बीच काठमाडौमा बसेको आठौं समन्वयात्मक बैठक सम्पन्न भएको छ । समन्वयात्मक बैठक सशस्त्र प्रहरी बल नेपालको प्रधान कार्यालय हल्चोकमा मंसिर १ गतेदेखि शुभआरम्भ भएको थियो । समन्वयात्मक बैठकले सीमामा हुने अवैध क्रियाकलाप रोकथाम तथा नियन्त्रण, लागूऔषधको ओसारपसार नियन्त्रण, तस्करी नियन्त्रण, सीमा सुरक्षालाई सबल सक्षम र प्रभावकारी बनाउन नियमित संयुक्त सीमा गस्ती, सीमा स्तम्भहरुको रेखदेख तथा संरक्षण, सूचना आदान प्रदानलगायत एक आपसमा दुई निकायबीच निरन्तर समन्वय तथा सहकार्य गर्ने सम्बन्धमा छलफल भएको हो। समन्वयात्मक बैठकमा सशस्त्र प्रहरी बल नेपालको तर्फबाट सशस्त्र प्रहरी महानिरीक्षक राजु अर्याल र सशस्त्र सीमा बल (एसएसबी) को तर्फबाट महानिर्देशक अमृतमोहन प्रसादले प्रतिनिधित्व गरेका हुन । प्रत्येक वर्ष आयोजना हुँदै आएको यस्तो बैठकमा सशस्त्र प्रहरी बल नेपालका महानिरीक्षक र भारतको सशस्त्र सीमा बलका महा निर्देशक बीच सीमा सुरक्षाका विषयमा विविध छलफल चल्ने गरेको छ ।
