सुरक्षा सम्बादाता ०६ मङ्सिर २०८१ काठमाडौँ । नेपाल कम्युनिष्ट पार्टी(नेकपा) का प्रवक्ता प्रकाण्ड सीले आफुहरुले क्रान्तिकारी विचार दृष्टिकोणबाट पार्टी पुनर्गठन नगरेको भए नेपाली जनताको प्रतिनिधित्व गर्ने पार्टी नै नहुने अवस्था आएको दाबी गरेका छन् ।
काठमाडौँमा आयोजना गरिएको पत्रकार सम्मेलनलाई सम्बाेधन गर्दै नेकपाका प्रवक्ता प्रकाण्ड सीले यस्तो दाबी गरेका हुन् ।

Advertisement 2

प्रवक्ता प्रकाण्डले अध्यारो सुरुङभित्र पुगेको नेपालको कम्युनिष्ट क्रान्तिकारी आन्दोलनलाई मंसिर ८ गतेले तोडेकाे जिकिर गरे । उनले भने, ‘नेपालका पार्टीहरु जनताको प्रतिनिधित्व गर्ने पार्टी बन्न सकेनन्, माओवादी बन्ने प्रयासमा थियो त्यो पनि सकेन, अहिले विचार लाइन र दृष्टिकाेणको हिसाबले नेकपाले देश र जनतालाई प्रतिनिधित्व गरेको छ, नेपाली जनतालाई ठुलो आसा पैदा गराएको छ ।’

Advertisement 3

उनले अबको २१ औं सताव्दी भनेको साम्राज्यवादी युगको अन्त्य र जनक्रान्तिको युगको सताब्दी हुने पनि ठोकुवा गरे ।

नेता प्रकाण्डले जनताको प्रतिनिधित्व गर्ने राजनीतिक पार्टी नभएसम्म जनताले मुक्ति नपाउने पनि बताए ।
उनले भने ‘जनताको प्रतिनिधित्व गर्ने राजनीतिक पार्टी नभएसम्म जनताको मुक्ति हुँदैन, उन्नति हुँदैन, लामो समय दासत्वको जीवन बिताउनु पर्छ, ०६२/०६३ को जनआन्दोलनपछि माओवादी पार्टी र नेतामा विचलन आएको सही हो, जसले गर्दा जनताको प्रतिनिधित्व गर्ने पार्टी भएन, त्यसको नेतृत्व नेपाल कम्युनिष्ट पार्टीले गर्यो ।’

उनले संघीय गणतन्त्रको नाममा नेपालमा दलाल पुँजीवादी व्यवस्था चलिरहेको भन्दै यो व्यवस्था जनताको नभएको बताए । उनले दलाल पुँजीवादको अन्त्य गरेर नेपालमा समाजवादी व्यवस्था स्थापित नगरेसम्म जनताको मुक्ति नहुने विचार व्यक्त गरे ।

उक्त पत्रकार सम्मेलनमा नेपाल कम्युनिस्ट पार्टीले पार्टी पुनर्गठन दिवसकाे अवसरमा विभिन्न कार्यक्रम गर्ने जानकारी समेत गराएको छ ।।