१५ चैत २०८१ काठमाडौं: नेपाल कम्युनिस्ट पार्टीका महासचिव नेत्रविक्रम चन्दले विदेशी शक्तिहरूको उक्साहटमा गणतन्त्रविरुद्ध षड्यन्त्र भइरहेको बताएका छन्। शुक्रवारको शत्ति प्रदर्शनसभामा उनले भने, “नेपाली जनताले सामन्तवादी र अधिनायकवादी प्रवृत्तिहरूलाई पराजित गरेका छन्, तर केही प्रतिगामी तत्वहरू विदेशी शक्तिहरूसँग मिलेर गणतन्त्रविरुद्ध षड्यन्त्र गर्दैछन्।”चन्दले संविधान संशोधनका लागि सहमतिको आधारमा काम गर्नुपर्नेमा जोड दिँदै भने, “हामीलाई सामन्ती र अधिनायकवादी हर्कतका कुनै पनि प्रयास स्वीकार छैन। पुँजीवादीहरूले बलिदानबाट आएको परिवर्तन कब्जा गरेर शोषण गरिरहेका छन्।”

उनले राजतन्त्रको पुनरुत्थानको पक्षमा कुरा गर्नेहरुलाई चेतावनी दिँदै भने, “नेपालमा अढाई सय वर्षसम्म राजतन्त्रले के गरेको थियो? पञ्चायतमा बोल्न पाइँदैनथ्यो, कमैया, दलित र किसानमाथि दमन थियो। यदि फेरि राजतन्त्र फर्काउने प्रयास गरिन्छ भने, त्यो प्रयास पछुताउनुपर्ने छ।”

चन्दले प्रतिगामी शक्तिहरूलाई सचेत गर्दै थपे, “यदि यस्ता प्रवृत्तिहरूले देशमा पुन: सामन्तवाद ल्याउने प्रयास गरे, नेपाली जनता त्यसलाई अस्वीकार गर्नेछन्।”