१६ चैत २०८१ काठमाडौं । काठमाडौं महानगरपालिकाले तीनकुने क्षेत्रको हालैको प्रदर्शनका क्रममा सार्वजनिक सम्पत्तिमा क्षति पुर्याएको आरोपमा पूर्वराजा ज्ञानेन्द्र शाहलाई जरिवाना तिराउने तयारी गरेको छ।
महानगर स्रोतका अनुसार प्रदर्शनका क्रममा सार्वजनिक संरचनामा तोडफोड र क्षति पुगेको भन्दै कानुनी प्रक्रिया अघि बढाइएको छ। उक्त प्रदर्शनका कारण सडक, ट्राफिक संकेत बोर्ड, बत्ती तथा अन्य महानगरको सम्पत्तिमा तोडफोड भएको बताइएको छ।
Advertisement 1
महानगर प्रमुख बालेन शाह नेतृत्वको प्रशासनले प्रदर्शनका कारण भएको क्षतिको मूल्यांकन गरिरहेको छ। प्रारम्भिक रिपोर्टअनुसार, लाखौं रुपैयाँबराबरको संरचनागत क्षति भएको अनुमान गरिएको छ। यदि पूर्वराजासहित प्रदर्शन आयोजकहरूले क्षतिपूर्ति नतिरे, कानुनी कारबाही अघि बढाइने बताइएको छ।
यस विषयमा पूर्वराजा शाह वा उनका निकट स्रोतबाट कुनै औपचारिक प्रतिक्रिया आइसकेको छैन। प्रदर्शनका क्रममा सार्वजनिक सम्पत्तिको क्षति भए पनि सो को जिम्मेवारी कसले लिने भन्ने विषयमा अहिले बहस चुलिएको छ।
Advertisement 2
यस घटनाले नेपालमा शान्तिपूर्ण प्रदर्शनको सीमा, सार्वजनिक सम्पत्तिको सुरक्षा, र पूर्वराजाको भूमिकाबारे नयाँ बहस जन्माएको छ।
