२२ चैत २०८१ काठमाडौं । उच्च अदालत तुलसीपुरको बुटवल इजलासले राष्ट्रिय स्वतन्त्र पार्टी (रास्वपा) का सभापति रवि लामिछानेलाई थुनामा पठाउने आदेश गरेको छ।

उच्च अदालत तुलसीपुरको बुटवल इजलासका न्यायाधीश रमेश ढकाल र स्वीकृति पराजुलीको संयुक्त इजलासले रूपन्देही जिल्ला अदालतको आदेश बदर गर्दै लामिछानेलाई थुनामा पठाउने आदेश दिएको हो।

यसअघि रूपन्देही जिल्ला अदालतले लामिछानेलाई १ करोड धरौटीमा रिहा गरेको थियो। सो आदेशविरुद्ध परेको पुनरावलोकन निवेदनमा बिहीबारदेखि सुनुवाइ सुरु भए पनि बहस नसकिएपछि शुक्रबारका लागि हेर्दाहेर्दैमा राखिएको थियो। शुक्रबार साँझ अदालतले लामिछानेलाई थुनामा पठाउने आदेश दिएको हो।

Advertisement 2

सुप्रिम सहकारी ठगी प्रकरणमा गत माघ १३ गते रूपन्देही जिल्ला अदालतका न्यायाधीश प्रह्लादकुमार योगीको इजलासले लामिछानेलाई एक करोड धरौटीमा रिहा गर्न आदेश दिएको थियो।

सुप्रिम सहकारी प्रकरणमा रवि लामिछाने, छविलाल जोशी, जीबी राईसहित ४२ जनालाई प्रतिवादी बनाइएको छ। उनीहरूमाथि सहकारीको ५५ करोड रुपैयाँभन्दा बढी रकम अपचलन गरेको अभियोग लगाइएको छ। जीबी राई भने अझै फरार छन्।