२७ चैत २०८१ काठमाडौं — अख्तियार दुरुपयोग अनुसन्धान आयोगले बाराको कलैया उपमहानगरपालिकामा सेनिटरी प्याड खरिदमा भ्रष्टाचार भएको आरोपमा पाँच जना विरुद्ध विशेष अदालतमा मुद्दा दायर गरेको छ।
आयोगका अनुसार आर्थिक वर्ष २०७७/७८ र २०७८/७९ का लागि सेनिटरी प्याड खरिदमा प्रतिप्याकेट रू. ७९.१ कायम गरी ठेक्का दिइएको थियो। उक्त प्रक्रियामा अनियमितता देखिएपछि आयोगले तत्कालीन प्रमुख प्रशासकीय अधिकृत प्रह्लादप्रसाद वर्णवाल, शिक्षा अधिकृत विजय अधिकारी, जिन्सी प्रमुख राजेश ठाकुर, लेखा अधिकृत दिव्या सर्राफ र सागरदेवी फर्मा हैटौंडाका सञ्चालक विमलेश साहविरुद्ध मुद्दा दायर गरेको हो।
आयोगले उनीहरू विरुद्ध रू. ५१ लाख ९९ हजार १२० बराबरको बिगो माग गर्दै कारबाहीको माग गरेको छ। फर्म सञ्चालक साहमाथि सरकारी कर्मचारीसँग मिलेमतो गरी गैरकानुनी लाभ लिएको आरोप पनि लगाइएको आयोगका प्रवक्ता राजेन्द्रकुमार पौडेलले जानकारी दिए।
