२०८२ बैशाख ०३ काठमाडौं । ई–सेवाको रकम चोरी गरेको आरोपमा एक युवकलाई प्रहरीले पक्राउ गरेको छ। पक्राउ पर्नेमा कञ्चनपुरको कृष्णपुर नगरपालिका–१ निवासी २२ वर्षीय राहुल बुढा रहेका छन्।

उपत्यका अपराध अनुसन्धान कार्यालय टेकुको टोलीले उनलाई मंगलबार काठमाडौंको अनामनगरबाट पक्राउ गरेको हो। प्रहरीले जनाएकोअनुसार, उनले विभिन्न व्यक्तिहरूलाई एसएमएसमार्फत फिसिङ लिंक पठाउने र त्यस लिंकमार्फत उनीहरूको ई–सेवा खातामा पहुँच प्राप्त गरी रकम चोरी गर्ने कार्य गर्दै आएका थिए।

अनुसन्धानबाट खुल्न आएअनुसार, उनले ४,००० भन्दा बढी व्यक्तिको ई–सेवा खाताबाट जम्मा १ करोड २ लाख रुपैयाँभन्दा बढी रकम चोरी गरेका छन्। पक्राउ परेका बुढालाई थप अनुसन्धानका लागि जिल्ला प्रहरी परिसर, काठमाडौंमा पठाइएको छ।