सुरक्षा सम्बादाता २८ फागुन २०८१ काठमाडौं; नेपाल प्रहरीको डीएसपी हुँ भन्दै ठगी गरेको आरोपमा प्रहरीले एक व्यक्तिलाई पक्राउ गरेको छ। पक्राउ पर्नेमा भक्तपुर सूर्यविनायक नगरपालिका–४ घर भई हाल काठमाडौँ महानगरपालिका–३ बस्ने ४७ वर्षीय राजु कर्मी श्रेष्ठ रहेका छन्।

श्रेष्ठले आफू नेपाल प्रहरीको रिटायर्ड डीएसपी भएको, इन्टरपोलसम्बन्धी काम गर्ने तथा विभिन्न देशका उच्चपदस्थ अधिकारीहरूसँग निकट सम्बन्ध रहेको बताई विभिन्न प्रलोभन देखाएर ७ लाख ८७ हजार रुपैयाँ ठगी गरेको आरोप छ। उनले मनपरी देशमा पठाइदिने आश्वासन दिँदै पीडितहरूबाट रकम असुलेको खुलेको छ।

प्रहरी वृत्त महाराजगन्जबाट खटिएको टोलीले अनुसन्धान गर्दै जाँदा श्रेष्ठको ठगी कार्यमा संलग्नता भेटिएपछि उनलाई पक्राउ गरेको हो। काठमाडौँ जिल्ला अदालतबाट ७ दिनको म्याद थप गरी उनलाई अनुसन्धान भइरहेको प्रहरीले जनाएको छ।