२०८२ बैशाख १३ काठमाडौं: नेपाल कम्युनिस्ट पार्टी (बहुमत)को सहायक संगठन क्रान्तिकारी युवा संगठन नेपालले आफ्नो प्रथम राष्ट्रिय सम्मेलन यही वैशाख १६, १७ र १८ गते काठमाडौंमा आयोजना गर्ने भएको छ। भ्रष्टाचार, अन्याय र कुशासनविरुद्ध सशक्त प्रतिवाद गर्दै आएको यो संगठनले ‘भ्रष्टाचार र कुशासनका विरुद्ध युवा आन्दोलन, सुशासन र समृद्धिका पक्षमा प्रथम राष्ट्रिय सम्मेलन’ भन्ने मूल नाराका साथ यो सम्मेलन गर्न लागेको हो।

कार्यक्रमको उद्घाटन सत्र माइतीघर मण्डलामा हुनेछ भने बन्दसत्र इच्छुक सांस्कृतिक प्रतिष्ठानमा सम्पन्न गरिने आयोजकले जानकारी दिएको छ। उद्घाटन सत्रमा विभिन्न वामपन्थी नेताहरू, सामाजिक अभियन्ता, बुद्धिजीवी र देशभरबाट आएका युवा प्रतिनिधिहरूको सहभागिता रहने अपेक्षा गरिएको छ।

सम्मेलनले संगठनको भावी नीति, कार्यक्रम र रणनीति निर्माण गर्ने मात्र होइन, नयाँ नेतृत्वको चयन समेत गर्ने संयोजक हरिष भट्टले जानकारी दिए। उनका अनुसार, यो सम्मेलन भ्रष्टाचार र सामाजिक अन्यायविरुद्ध आवाज उठाउने युवाहरूको साझा मञ्च बन्नेछ।

Advertisement 2

क्रान्तिकारी युवा संगठन नेपालले विगत केही वर्षयता भ्रष्टाचारविरोधी अभियान, सामाजिक न्याय, शिक्षा र रोजगारीको अधिकारका पक्षमा आन्दोलन गर्दै आएको छ। संगठनका अनुसार, देशमा फैलिँदो कुशासन, बेरोजगारी, सार्वजनिक सेवा प्रणालीमा देखिएको निष्क्रियता र युवाहरूको पलायनविरुद्ध एकीकृत आवाज उठाउनु अहिलेको आवश्यकता हो।

कार्यक्रममा सातै प्रदेश र विभिन्न जिल्ला तथा विश्वविद्यालयहरूबाट प्रतिनिधिहरूको उल्लेखनीय उपस्थिति रहने अपेक्षा गरिएको छ। सम्मेलनलाई सफल बनाउँदै देशभर युवाहरूमा जागरण ल्याउने उद्देश्यका साथ तयारी तीव्र पारिएको छ।