२०८२ बैशाख ३० कोहलपुर, बाँके – कोहलपुर नगरपालिकाका कक्षा ६ देखि ८ सम्मका विद्यालयमा पढाइ हुँदै आएको ‘हाम्रो कोहलपुर’ नामक स्थानीय पुस्तक अहिले विवादको घेरामा परेको छ। नगरपालिकाले औपचारिक रूपमा पुस्तक स्वीकृत नगरेको बताइरहँदा, सोही पुस्तक विद्यार्थीहरूसँग रहेको, परीक्षा दिइएको, र अभिभावकहरूले खरिद गरेको प्रमाणित भइसकेको छ।

समाजिक अभियन्ता भुम भण्डारीका अनुसार, पालिकाले भनेको “यो पाठ्यक्रमको सन्दर्भ सामग्री मात्र हो, स्वीकृत गरिएको छैन” भन्ने भनाइसँग व्यवहारिक अवस्था मेल खाँदैन। भण्डारीले प्रश्न गरेका छन् – “यदि पुस्तक अनाधिकृत हो भने, कसरी छापियो? कसरी विद्यालयमा लागू गरियो? र कसरी पसलहरूमा खुलेआम बिक्री भइरहेका छन्?”

तथ्यांक भन्छ:

Advertisement 2

गत शैक्षिक सत्रमा कक्षा ८ मा ३,५२६ विद्यार्थी भर्ना भएका थिए भने परीक्षामा ३,०८४ जना सहभागी भएका थिए। तीमध्ये अधिकांशले यही विवादास्पद पुस्तकका आधारमा परीक्षा दिएका छन्।

शिक्षा क्षेत्रमा गम्भीर प्रश्न:

Advertisement 3

नयाँ शैक्षिक सत्र सुरु भइसकेको अवस्थामा समेत यस किसिमको अस्पष्टता र अनियमितता हुँदा शिक्षा क्षेत्रमै प्रश्न उठेको छ। स्थानीय अभिभावक, विद्यार्थी र सरोकारवालाहरूले यसमा कमिसनको खेल भएको आशंका समेत व्यक्त गरेका छन्।

माग: पारदर्शिता र जवाफदेहिता

समाजिक अभियन्ता भण्डारीले सम्बन्धित निकायसँग माग गरेका छन् — जनतालाई झुक्याएर शिक्षा प्रणालीमा खेलवाड नगर्न, शैक्षिक सामग्रीमा पारदर्शिता कायम गर्न र अनधिकृत क्रियाकलापको छानबिन गर्न ।