२०८२ जेठ २४ कोहलपुर, बाँके: कोहलपुर नगरपालिकाका सबै वडामा विदेश जान चाहने सेवाग्राहीहरूले सरकारी कागजात अंग्रेजी भाषामा बनाउन अनौठो र झन्झटिलो प्रक्रिया भोगिरहेका छन्। कागजात बनाउने काम कार्यालयमै नहुने, बरु सेवाग्राहीलाई निजी प्रेसमा जान सुझाव दिने प्रवृत्ति व्यापक देखिएको छ।

सेवाग्राहीहरूले जब वडामा गएर कागजात अंग्रेजीमा चाहिन्छ भन्छन्, त्यहाँका कर्मचारीहरू “तलको प्रेसमा जानु” भन्ने गर्छन्। ती निजी प्रेसहरूले सरकारी लेटरहेड प्रयोग गरेर कागजात तयार गर्छन् र त्यसबापत प्रति कागजात ३ सय रुपैयाँसम्म शुल्क लिन्छन्।

यत्तिले मात्र प्रक्रिया सकिँदैन। प्रेसबाट तयार भएको कागजात फेरि वडामा ल्याएर कर्मचारीको हस्ताक्षर र छाप गराउनु पर्छ। यसरी एउटै कागजातका लागि सेवाग्राहीलाई दुबै ठाउँमा धाउनु, अतिरिक्त खर्च बेहोनु र समय बर्बाद गर्नुपर्ने बाध्यता बनिरहेको छ।

Advertisement 2

सरकारी कार्यालयमा अंग्रेजी भाषामा दक्ष जनशक्ति नहुनु वा अनुवाद गर्ने क्षमता नहुनु यस्तो प्रवृत्तिको कारण हुनसक्छ। तर धेरै नागरिक यो अभ्यासलाई वडाका कर्मचारी र निजी प्रेसबीचको अनौपचारिक मिलेमतोका रूपमा पनि हेर्न थालेका छन्।

संवेदनशील सरकारी लेटरहेड निजी प्रेसमा प्रयोग हुनु, सेवा शुल्कको निश्चित मापदण्ड नहुनु, र कानुनी प्रक्रिया नअपनाइनुले यसले सेवा पारदर्शिता र जवाफदेहितामा गम्भीर प्रश्न उठाएको छ। सम्बन्धित निकायहरूले यसमा चासो देखाई पारदर्शी र सेवा केन्द्रित प्रणाली विकास गर्नु अत्यावश्यक देखिएको छ।