काठमाडौँ । प्रेस काउन्सिल नेपालले सुनसरीलगायत पूर्वी जिल्लामा हालै घटेका संवेदनशील तथा दुःखद घटनासम्बन्धी समाचार सम्प्रेषण गर्दा सञ्चार माध्यम, पत्रकार तथा सामाजिक सञ्जाल प्रयोगकर्तालाई संयमित, जिम्मेवार र तथ्यमा आधारित सूचना मात्र सार्वजनिक गर्न आग्रह गरेको छ।
काउन्सिलका सहप्रशासकीय अधिकृत रामशरण बोहराले शुक्रबार जारी गरेको विज्ञप्तिमा आधिकारिक स्रोतबाट पुष्टि भएका तथ्य मात्र प्रकाशन तथा प्रसारण गर्न आग्रह गरिएको छ। साथै, संवेदनशील घटनाको समाचार सम्प्रेषण गर्दा उच्च व्यावसायिकता, संयमता र जिम्मेवारी प्रदर्शन गर्नुपर्नेमा जोड दिइएको छ।
विज्ञप्तिमा अपुष्ट सूचना, अफवाह, उत्तेजना फैलाउने सामग्री, घृणात्मक अभिव्यक्ति तथा सामाजिक, धार्मिक वा साम्प्रदायिक सद्भावमा प्रतिकूल असर पर्ने कुनै पनि सामग्री प्रकाशन, प्रसारण वा सम्प्रेषण नगर्न सञ्चार माध्यम र सामाजिक सञ्जाल प्रयोगकर्तालाई आग्रह गरिएको छ।
काउन्सिलले घटनासम्बन्धी प्रकाशित तथा प्रसारित सामग्रीको निरन्तर अनुगमन भइरहेको जनाएको छ। साथै, पीडित तथा प्रभावित व्यक्तिको गोपनीयता र मानवीय मर्यादाको सम्मान गर्न, अनुसन्धान प्रक्रियामा असर पुग्ने अनुमान वा अपुष्ट विवरण सार्वजनिक नगर्न तथा पत्रकार आचारसंहिताको पूर्ण पालना गर्न पनि अनुरोध गरेको छ।
पत्रकार आचारसंहिता विपरीत समाचार वा सामग्री प्रकाशन तथा प्रसारण भएको पाइएमा काउन्सिलको अनुगमन शाखामा जानकारी गराई सहयोग गर्न सञ्चार संस्था, सञ्चारकर्मी तथा सर्वसाधारणलाई आग्रह गरिएको विज्ञप्तिमा उल्लेख छ।
‘संवेदनशील घटनालाई कुनै पनि बहानामा राजनीतिक, धार्मिक वा सामाजिक ध्रुवीकरणको माध्यम नबनाई शान्ति, सामाजिक सद्भाव र जिम्मेवार सञ्चार संस्कृतिको संरक्षणमा सबै पक्षबाट सहयोग हुने विश्वास प्रेस काउन्सिल नेपालले लिएको छ,’ विज्ञप्तिमा भनिएको छ।
काउन्सिलले घटनामा ज्यान गुमाएका व्यक्तिप्रति हार्दिक श्रद्धाञ्जली अर्पण गर्दै शोकसन्तप्त परिवारप्रति गहिरो समवेदना व्यक्त गरेको छ। साथै, घाइतेहरूको शीघ्र तथा पूर्ण स्वास्थ्यलाभको कामना पनि गरेको छ।