कोहलपुर। कोहलपुर–२ मा अवस्थित गोरखा युनाइटेड पब्लिक स्कुलले आफ्नो २५औँ वार्षिकोत्सव (रजत जयन्ती) विभिन्न कार्यक्रमका साथ भव्य रूपमा सम्पन्न गरेको छ।
शनिबार विद्यालय परिसरमा आयोजित समारोहको उद्घाटन कोहलपुर नगरपालिकाकी उपप्रमुख संगिता सुवेदीले गरेकी थिइन्। उद्घाटन समारोहलाई सम्बोधन गर्दै उनले गुणस्तरीय शिक्षा प्रवाहमार्फत विद्यालयले शैक्षिक क्षेत्रमा पुर्याएको योगदानको प्रशंसा गर्दै आगामी दिनमा पनि उत्कृष्टता कायम राख्न शुभकामना व्यक्त गरिन्।
कार्यक्रममा अभिभावकका तर्फबाट बोल्दै डा. देवेन्द्र आचार्यले शिक्षा, अनुशासन तथा नैतिक मूल्यको महत्वबारे प्रकाश पारे। विद्यालयले विद्यार्थीहरूको सर्वाङ्गीण विकासमा खेलेको भूमिकाको प्रशंसा गर्दै उनले अझ उत्कृष्ट उपलब्धि हासिल गर्ने विश्वास व्यक्त गरे।
सो अवसरमा विद्यालयका संस्थापक अध्यक्ष केशरबहादुर आले मगरलाई विशेष सम्मान गरिएको थियो। वक्ताहरूले विद्यालय स्थापना र विकासमा उनले पुर्याएको योगदानको उच्च मूल्यांकन गर्दै विद्यालयलाई वर्तमान उचाइमा पुर्याउन खेलेको भूमिकाको खुलेर प्रशंसा गरेका थिए।
वार्षिकोत्सव समारोहमा विभिन्न सरकारी कार्यालयका प्रतिनिधि, शिक्षाविद्, समाजसेवी तथा अन्य विशिष्ट व्यक्तित्वहरूको उल्लेखनीय उपस्थिति रहेको थियो। कार्यक्रममा विद्यालयका उत्कृष्ट शैक्षिक उपलब्धि हासिल गरेका ५०० भन्दा बढी विद्यार्थीलाई सम्मानपत्र, पुरस्कार तथा छात्रवृत्ति प्रदान गरिएको विद्यालयले जनाएको छ।
विद्यालयको शैक्षिक गुणस्तर अभिवृद्धिमा योगदान पुर्याउने शिक्षक तथा कर्मचारीलाई ‘बेस्ट शिक्षक’ र ‘बेस्ट कर्मचारी’ सम्मानबाट सम्मानित गरिएको थियो। विद्यालय प्रशासनका अनुसार सम्मानित व्यक्तिहरूको योगदानले विद्यालयलाई उत्कृष्ट शैक्षिक संस्थाको रूपमा स्थापित गर्न महत्वपूर्ण भूमिका खेलेको छ।
समारोहमा विद्यार्थीहरूले प्रस्तुत गरेका विविध सांस्कृतिक कार्यक्रम, नृत्य, गीत तथा प्रतिभा प्रदर्शनले उपस्थित दर्शकको मन जितेका थिए। कार्यक्रममा नेपाली कला, संस्कृति र सिर्जनशीलताको झल्को समेत देख्न सकिन्थ्यो।
विद्यालय व्यवस्थापन पक्षले आगामी दिनमा प्रविधिमैत्री, प्रभावकारी तथा गुणस्तरीय शिक्षा प्रदान गर्दै विद्यार्थीहरूको उज्ज्वल भविष्य निर्माणमा निरन्तर लागिरहने प्रतिबद्धता जनाएको छ। साथै स्वास्थ्य शिविर, रक्तदान कार्यक्रम तथा शैक्षिक प्रदर्शनीले वार्षिकोत्सवलाई थप विशेष बनाएको आयोजकले जनाएको छ।
२५ वर्षे सफल यात्राको उत्सवका रूपमा सम्पन्न रजत जयन्ती समारोहले विद्यालय परिवारमा नयाँ उत्साह, ऊर्जा र आगामी दिनका लागि थप जिम्मेवारीबोध सिर्जना गरेको सहभागीहरूले बताएका छन्।
