काठमाडौं । ललितपुरको भनिमण्डलबाट ठूलो परिमाणको नगदसहित पक्राउ परेका २५ वर्षीय गौरव स्याङतान अनलाइन गेमिङ र क्रिप्टो करेन्सी कारोबारमा संलग्न रहेको खुलेको छ।
जिल्ला प्रहरी परिसर ललितपुरका अनुसार सिन्धुली पिपलभञ्ज्याङ घर भएका स्याङतान सोमबार साँझ ललितपुर महानगरपालिका–४ भनिमण्डलबाट पक्राउ परेका हुन्।
उपत्यका प्रहरी कार्यालय र ललितपुर प्रहरीको संयुक्त टोलीले गरेको कारबाहीमा उनको डेराबाट ९१ लाख ५० हजार रुपैयाँ नगद, १ थान पैसा गन्ने मेसिन र १.५ किलो गाँजा बरामद गरिएको छ।
त्यससँगै अनलाइन गेमिङ र क्रिप्टो कारोबारका लागि प्रयोग हुँदै आएका ११ थान मोबाइल, ल्यापटप र आइप्याड समेत प्रहरीले नियन्त्रणमा लिएको छ।
जिल्ला प्रहरी परिसर ललितपुरले स्याङतानमाथि थप अनुसन्धान भइरहेको जनाएको छ।
