काभ्रेपलाञ्चोक । नमोबुद्ध नगरपालिका–४ स्थित प्रहरी चौकी भकुण्डेका इन्चार्ज प्रहरी सहायक निरीक्षक (सइ) गणेशप्रसाद श्रेष्ठलाई स्थानीयले एक युवतीसहित होटेलबाट नियन्त्रणमा लिएका छन् ।
स्थानीयका अनुसार श्रेष्ठलाई मध्यरातमा नमोबुद्धस्थित एक होटलबाट युवतीसहित नियन्त्रणमा लिएर जिल्ला प्रहरी कार्यालय धुलिखेलमा बुझाइएको हो । घटनापछि जिल्ला प्रहरी कार्यालय काभ्रेपलाञ्चोकको टोलीले श्रेष्ठलाई जिल्ला कार्यालयमा ल्याएको जनाएको छ ।
जिम्मेवारी र प्रहरी मर्यादाविपरीत गतिविधि गरेको आरोपमा स्थानीयले श्रेष्ठलाई नियन्त्रणमा लिएको बताइएको छ । यद्यपि, घटनाबारे प्रहरीको अनुसन्धानबाट आधिकारिक तथ्य भने खुल्न बाँकी छ ।
श्रेष्ठ गत जेठमा जिल्ला प्रहरी कार्यालय काभ्रेपलाञ्चोकबाट उत्कृष्ट प्रहरीका रूपमा घोषित भएका थिए ।
जिल्ला प्रहरी कार्यालय काभ्रेपलाञ्चोकका प्रमुख एसपी रबिन कार्कीले स्थानीयबाट खबर आएपछि श्रेष्ठलाई जिल्ला प्रहरी कार्यालयमा ल्याइएको जानकारी दिए ।
‘श्रेष्ठसहित दुईजना नै प्रहरी नियन्त्रणमा छन्, थप अनुसन्धान भइरहेको छ,’ एसपी कार्कीले भने ।
घटनाबारे थप अनुसन्धान भइरहेको प्रहरीले जनाएको छ ।
