काठमाडौँ । दसैँ पर्वका अवसरमा नेपाल प्रहरी र सशस्त्र प्रहरी बलले काठमाडौँ उपत्यकामा सञ्चालन गरेको निःशुल्क बस सेवाबाट तीन हजार ५८५ यात्रु लाभान्वित भएका छन् ।
प्रहरी प्रधान कार्यालयका अनुसार नेपाल प्रहरीद्वारा सञ्चालित तीनवटा सवारीसाधनमार्फत कात्तिक ३ गते ५१० र कात्तिक ४ गते ८९६ गरी एक हजार ४०६ यात्रुले निःशुल्क यात्रा गरेका छन् ।
त्यसैगरी, सशस्त्र प्रहरी बलद्वारा सञ्चालित दुईवटा बसमार्फत अष्टमी, नवमी र दशमीका दिन गरी दुई हजार १७९ यात्रुले निःशुल्क सवारी सेवा लिएका छन् । सशस्त्र प्रहरीका सहप्रवक्ता शैलेन्द्र थापाले उक्त जानकारी दिएका हुन् ।
दसैँका बेला सार्वजनिक सवारीसाधनको अभाव हुन सक्ने भएकाले यात्रुको आवागमन सहज बनाउन दुवै सुरक्षा निकायले निःशुल्क बस सेवा सञ्चालन गरेका थिए ।
