काठमाडौं । खसीको मासु भन्दै बाख्राको मासु बिक्री गरेको आरोपमा प्रहरीले काठमाडौंको रातोपुलबाट तीन जनालाई पक्राउ गरेको छ ।
काठमाडौं महानगरपालिका–८, रातोपुल नजिकै सञ्चालित सफिक मासु पसलबाट उनीहरूलाई पक्राउ गरिएको जिल्ला प्रहरी परिसर काठमाडौंले जनाएको छ ।
पक्राउ पर्नेमा भारतको सीतामढी घर भएका तथा मासु पसल सञ्चालक २५ वर्षीय महमद इम्रान मन्सुरी, नुवाकोट घर भई हाल काठमाडौं महानगरपालिका–७, सिफल बस्ने १८ वर्षीय अरुण कार्की र मकवानपुरको हेटौँडा महानगरपालिका–३ घर भई हाल रातोपुल बस्दै आएका २१ वर्षीय सुजन रसाइली रहेका छन् ।
प्रहरीका अनुसार उनीहरूले बाख्राको मासुलाई खसीको मासु भन्दै प्रतिकिलो १ हजार ८ सय रुपैयाँमा बिक्री गर्ने गरेको पाइएको छ ।
गोप्य सूचनाका आधारमा प्रहरी टोलीले मासु पसलमा छापा मारेको थियो । छापा मार्ने क्रममा पसलको भित्री सटरमा बाख्रा काटेर मासु तयार गरिरहेको अवस्थामा उनीहरूलाई पक्राउ गरिएको प्रहरीले जनाएको छ ।
यस्तै, प्रहरीले पसलको पछाडि काट्ने तयारी अवस्थामा राखिएको एउटा जिउँदो बाख्रा समेत नियन्त्रणमा लिएको छ ।
पक्राउ परेका तीनै जनालाई हाल प्रहरी वृत्त गौशालामा राखिएको छ । घटनाबारे थप अनुसन्धान भइरहेको जिल्ला प्रहरी परिसर काठमाडौंले जनाएको छ ।
