नेपालगञ्ज, बाँके । लागूऔषध नियन्त्रण ब्यूरो शाखा कार्यालय नेपालगञ्जले छुट्टाछुट्टै अपरेशनमार्फत तीन जनालाई पक्राउ गर्दै ठूलो परिमाणमा लागूऔषध तथा अन्य सामग्री बरामद गरेको छ।
बर्दियाका दुई जना ८९० एम्पुलसहित पक्राउ
ब्यूरोका अनुसार २०८३ जेठ २४ गते राति करिब १०:३० बजे प्राप्त विशेष सूचनाका आधारमा बाँकेको नेपालगञ्ज उपमहानगरपालिका–६ एकतानगर नजिकबाट दुई जनालाई पक्राउ गरिएको हो।
पक्राउ पर्नेमा बर्दियाको बारबर्दिया नगरपालिका–८ निवासी ३८ वर्षीय लाल बहादुर चौधरी र कैलालीको जानकी गाउँपालिका–५ निवासी ४४ वर्षीय क्याप्टेन चौधरी रहेका छन्।
प्रहरीले उनीहरूको शरीर तथा साथमा रहेको झोलाको खानतलासी गर्दा Pheniramine Maleate Injection का ८९० एम्पुल तथा दुई थान मोबाइल फोन बरामद गरेको जनाएको छ। पक्राउ परेका दुवै जनालाई आवश्यक कारबाहीका लागि जिल्ला प्रहरी कार्यालय बाँकेमा बुझाइएको छ।
यस अपरेशनमा प्रहरी सहायक हवल्दार हंसराम कठायत र प्रहरी जवान बिक्रम नेपालीको सक्रिय भूमिका रहेको बताइएको छ।
खैरो हेरोइन, नगद र डिजिटल तराजुसहित एक जना पक्राउ
यस्तै, २०८३ जेठ २५ गते साँझ ५ बजे बाँकेको बैजनाथ गाउँपालिका–२ मकैबारीस्थित एक घरमा गरिएको छापामारीबाट २८ वर्षीय सन्तोष थापा मगर पक्राउ परेका छन्।
प्राप्त सूचनाका आधारमा गरिएको खानतलासीका क्रममा प्रहरीले उनको साथबाट ८०० मिलिग्राम खैरो हेरोइन, दुई थान मोबाइल फोन, रु ६७ हजार ९ सय ५५ नगद तथा एक थान डिजिटल तराजु बरामद गरेको जनाएको छ।
पक्राउ परेका मगरलाई थप अनुसन्धान तथा कानुनी कारबाहीका लागि इलाका प्रहरी कार्यालय कोहलपुरमा बुझाइएको छ।
यस अपरेशनमा प्रहरी हवल्दार कृष्णकुमार डाँगीको विशेष भूमिका रहेको ब्यूरोले जनाएको छ।
लागूऔषध नियन्त्रणमा प्रहरी सक्रिय
हालका दिनमा बाँके र आसपासका जिल्लामा लागूऔषध कारोबार नियन्त्रणका लागि सुरक्षा निकायले निगरानी तथा अपरेशनलाई तीव्र बनाएको छ। प्रहरीले लागूऔषधसम्बन्धी सूचना भए तत्काल नजिकको प्रहरी कार्यालयमा जानकारी गराउन सर्वसाधारणलाई आग्रह गरेको छ।