कोहलपुर । बाँकेको कोहलपुरबाट एक किलोभन्दा बढी अफिमसहित पक्राउ परेका २९ वर्षीय विशाल थापामगर काठमाडौंस्थित केन्द्रीय कारागार सुन्धाराबाट फरार भएका कैदी रहेको खुलासा भएको छ।
प्रहरीका अनुसार बैजनाथ गाउँपालिका–३ नौवस्ताका विशाल लागूऔषध खैरो हेरोइन मुद्दामा दोषी ठहर भई १० वर्ष कैद सजाय भोगिरहेका थिए। उनीविरुद्ध २०८१ वैशाख २३ गते काठमाडौंमा लागूऔषध मुद्दा दर्ता भएको थियो भने अदालतले उक्त मुद्दामा १० वर्ष कैद सजाय सुनाएको थियो।
सजाय भुक्तानका क्रममा सुन्धारा कारागारमा रहेका विशाल गत भदौ २४ गते जेनजी आन्दोलनका बेला कारागारबाट फरार भएका थिए। हाल कोहलपुरमा पक्राउ परेपछि अनुसन्धानका क्रममा उनी फरार कैदीसमेत रहेको पुष्टि भएको प्रहरीले जनाएको छ।
लागूऔषध नियन्त्रण ब्यूरो शाखा कार्यालय नेपालगन्ज र इलाका प्रहरी कार्यालय कोहलपुरको संयुक्त टोलीले मंगलबार राति करिब १० बजे कोहलपुर नगरपालिका–१ कौशिलानगरस्थित बरपिपल प्रतिक्षालय क्षेत्रबाट विशालसँगै सोही स्थानका ४८ वर्षीय गगनबहादुर परियारलाई एक किलोभन्दा बढी अफिमसहित पक्राउ गरेको थियो।
प्रहरीले विशालको आपराधिक पृष्ठभूमि तथा लागूऔषध कारोबारसँग सम्बन्धित अन्य पक्षबारे थप अनुसन्धान जारी रहेको जनाएको छ।