बुटवल । बुटवलको एक फार्मेसीमा प्रहरीले छापा मारेको छ। बुटवलको अस्पताल लाइनमा सञ्चालित सैनामैना फार्मेसीमा प्रहरीले छापा मारेको हो ।
इलाका प्रहरी कार्यालय बुटवलको टोलीले विशेष सूचनाका आधारमा छापा मारेको बुटवलका प्रमुख प्रहरी नायव उपरीक्षक निशान्त श्रीवास्तवले जानकारी दिए । उक्त फार्मेसीमा नक्कली तथा प्रतिबन्धित औषधीको अवैध कारोबार भइरहेको आशङ्कामा छापा मारिएको उनले बताए ।
भारतमा निर्मित केही औषधी नक्कली भएको आशङ्कामा औषधी व्यवस्था विभागले त्यस्ता औषधी खरिद–बिक्री नगर्न निर्देशन जारी गरिसकेको छ । त्यस्ता औषधी समेत सो फार्मेसीबाट बिक्री भएको सूचना पाएपछि छापा मारिएको प्रहरीले जनाएको छ।छापाका क्रममा फार्मेसी तथा गोदाममा लुकाइएका शङ्कास्पद औषधीहरू फेला परेका छन् । पक्राउ परेका सञ्चालकविरुद्ध औषधि ऐन तथा जनस्वास्थ्यविरुद्धको कसुरअन्तर्गत कानुनी प्रक्रिया अघि बढाइने प्रहरीले जनाएको छ।