धरान, सुनसरी । सुनसरीको धरान उपमहानगरपालिका–२० स्थित च्यानडाँडा सिरान सामुदायिक वनभित्र बेवारिसे अवस्थामा लुकाइराखिएको १२० केजी गाँजा प्रहरीले बरामद गरेको छ।
शुक्रबार साँझ करिब ५:२० बजे विशेष सूचनाका आधारमा खटिएको संयुक्त प्रहरी टोलीले जंगल क्षेत्रमा खोजतलास गर्ने क्रममा कालो प्लास्टिकमा प्याक गरिएका चारवटा पोका फेला पारेको थियो। ती पोकाको तौल गर्दा कुल १२० केजी गाँजा रहेको पुष्टि भएको प्रहरीले जनाएको छ।
बरामद गरिएको गाँजा आवश्यक कानुनी प्रक्रिया पूरा गरी इलाका प्रहरी कार्यालय धरानमा राखिएको छ। गाँजा कसले र किन त्यहाँ लुकाएर राखेको हो भन्ने विषयमा प्रहरीले थप अनुसन्धान अघि बढाएको जनाएको छ।
प्रहरीले घटनासँग संलग्न व्यक्तिको पहिचान तथा खोजी कार्यसमेत तीव्र बनाएको जनाएको छ।