०२ जेठ २०८३ बाँके ;- विश्व सडक सुरक्षा सप्ताहको अवसर पारेर बाँके जिल्लामा यात्रुवाहक सार्वजनिक सवारी साधनका चालक तथा सहचालकहरूको सामूहिक स्वास्थ्य परीक्षण गरिएको छ। जिल्ला ट्राफिक प्रहरी कार्यालय कोहलपुर, बाँके र जिल्ला प्रहरी कार्यालय बाँकेको आयोजनामा तथा लुम्विनी प्रदेश प्रहरी अस्पताल नेपालगंजको प्राविधिक सहकार्यमा नेपालगंज बसपार्कमा उक्त स्वास्थ्य शिविर सम्पन्न भएको हो।
बाँके नेपालगंज उप-महानगरपालिका वडा नं. ४ स्थित नेपालगंज बसपार्कमा आयोजित शिविरमा करिब १५० जना चालक तथा सहचालकहरूको स्वास्थ्य परीक्षण गरिएको प्रहरीले जनाएको छ। परीक्षणमा रक्तचाप, मधुमेह, आँखा, श्रवणशक्ति, मुटुको अवस्था तथा सामान्य शारीरिक परीक्षणलाई प्राथमिकता दिइएको थियो।
जिल्ला ट्राफिक प्रहरी कार्यालय कोहलपुरका प्रमुख प्रहरी निरीक्षक कनक शाहिले सडक दुर्घटनाको मुख्य कारणहरूमध्ये चालकको स्वास्थ्य अवस्था समेत रहेको बताउँदै नियमित स्वास्थ्य जाँच अपरिहार्य रहेको बताए। “चालकको शारीरिक र मानसिक रूपमा स्वस्थ हुनु यात्रुको सुरक्षाको लागि पहिलो सर्त हो,” उनले भने।
लुम्विनी प्रदेश प्रहरी अस्पताल नेपालगंजका डाक्टरहरूको टोलीले चालकहरूको स्वास्थ्य अवस्थाको विस्तृत मूल्यांकन गरेको थियो। परीक्षणका क्रममा केही चालकहरूमा उच्च रक्तचाप र मधुमेहको प्रारम्भिक लक्षण देखिएको अस्पताल स्रोतले जनाएको छ। उनीहरूलाई थप उपचार तथा परामर्शको सिफारिस गरिएको छ।
कार्यक्रममा बोल्दै जिल्ला प्रहरी कार्यालय बाँकेका प्रतिनिधिले विश्व सडक सुरक्षा सप्ताहका अवसरमा सचेतनामूलक कार्यक्रमहरू नै दुर्घटना न्यूनीकरणको आधार भएको बताए। यस अभियानलाई निरन्तरता दिइने प्रतिबद्धता समेत जनाइएको छ।
स्वास्थ्य परीक्षणपछि चालकहरूले सवारी चलाउनुअघि आफ्नो स्वास्थ्य जाँच गर्नुको महत्त्व बुझेको बताए। बस चालक टेकबहादुर थापाले भने, “धेरै पटक थकान र निद्रा लाग्ने समस्या हुँदो थियो, आज डाक्टरले उच्च रक्तचाप देखिएको भनेपछि उपचार गराउने प्रेरणा मिल्यो।”
कार्यक्रममा ट्राफिक प्रहरीले सडक सुरक्षा सम्बन्धी जनचेतनामूलक पम्प्लेट, स्टिकर तथा पर्चा वितरण गरेको थियो। साथै, मादक पदार्थ सेवन गरी सवारी चलाउन नहुने, सिट बेल्ट र हेलमेट अनिवार्य प्रयोग गर्नुपर्ने, र यात्रा गर्दा आराम गर्ने उचित समय निकाल्नुपर्ने जस्ता विषयमा पनि अन्तरक्रिया गरिएको थियो।
जिल्ला ट्राफिक प्रहरी कार्यालयले यस्ता स्वास्थ्य शिविर भविष्यमा समेत जिल्लाका विभिन्न स्थानमा सञ्चालन गर्ने योजना सार्वजनिक गरेको छ। सडक दुर्घटनामा कमी ल्याउन चालकदेखि यात्रुसम्मको साझा सचेतना आवश्यक रहेको निष्कर्ष कार्यक्रमले दिएको छ।
