भक्तपुर — अख्तियार दुरुपयोग अनुसन्धान आयोगले भूमिसुधार तथा मालपोत कार्यालय भक्तपुरका प्रमुख मालपोत अधिकृत कुमार आचार्य र कार्यालय सहयोगी टिकाराम राउतविरुद्ध २४ लाख ५० हजार रुपैयाँ घुस प्रकरणमा विशेष अदालत काठमाडौंमा आरोपपत्र दायर गरेको छ।
अख्तियारका अनुसार, चाँगुनारायण नगरपालिका–५ मा रहेको १४ रोपनी ४ आना क्षेत्रफलको जग्गा मोहीको नाममा दर्ता प्रमाण–पूर्जा बनाउनका लागि सेवाग्राहीसँग सो रकम घुस मागिएको थियो।
जग्गा बाँडफाँड तथा नामसारीका लागि सहजता प्रदान गर्ने बहानामा आचार्य र राउतले मिलेमतो गरी रकम लिएको प्रमाण फेला परेको आयोगले जनाएको छ।
अख्तियारको टोलीले मालपोत कार्यालय परिसरमै पुगेर दुवै जनालाई मोबाइल डिभाइससहित र नगद रकम नियन्त्रणमा लिएको थियो।
दुवै प्रतिवादीमाथि भ्रष्टाचार निवारण ऐन २०५९ अनुसार कैद र जरिवाना सजायको मागदाबी गर्दै बिगो कायम गरी मुद्दा दायर गरिएको अख्तियारका प्रवक्ता राजेन्द्र कुमार पौडेलले जानकारी दिएका छन्।
