कोहलपुर, बाँके – २०८२ भदौ १
नेकपा (माओवादी केन्द्र) कोहलपुर, बाँकेद्वारा नियमित रक्तदान गर्ने रक्तदाताहरूको सक्रिय सहभागितामा रक्तदान कार्यक्रम सम्पन्न गरिएको छ। कार्यक्रम कोहलपुरको दशबिगाहा क्षेत्रस्थित पूर्वी गेट नजिक रहेको ब्लड बैंकमा आयोजना गरिएको थियो।
यस रक्तदान कार्यक्रममा जम्मा २३ प्वाइन्ट रगत संकलन गरिएको छ। कार्यक्रममा सहभागी अधिकांश स्वयंसेवीहरू नियमित रक्तदाता हुन्, जसले निरन्तर रूपमा समुदायलाई आवश्यक परेको बेलामा रगत दिएर जीवन बचाउने कार्य गर्दै आएका छन्।
कार्यक्रमको उद्देश्य आपत्कालीन अवस्था र बिरामीलाई सहज रूपमा रगत उपलब्ध गराउने हो। आयोजकहरूका अनुसार यस्ता मानवीय कार्यहरूलाई आगामी दिनहरूमा अझ व्यवस्थित र नियमित रूपमा सञ्चालन गरिनेछ।
स्थानिय युवाहरू, पार्टी कार्यकर्ता तथा अन्य समाजसेवीहरूको उपस्थिति र सहयोगले कार्यक्रम थप सफल भएको थियो।
“रक्तदान जीवनदान हो भन्ने भावनाका साथ हामीले यो कार्यक्रम सञ्चालन गरेका हौं,” आयोजक समूहका एक सदस्यले बताए।
यो कार्यक्रमले समुदायमा सकारात्मक सन्देश फैलाएको छ र नियमित रक्तदान संस्कृतिको प्रवर्द्धनमा सहयोग पुग्ने विश्वास लिइएको छ।
