कोहलपुर, बाँके।
नेपालगन्ज–कोहलपुर सडकखण्डअन्तर्गत पार्वतिपुरमा ट्राफिक दुर्घटना न्यूनीकरणका लागि ‘गति सिमित राडर गन’को प्रयोगबारे सचेतना कार्यक्रम सम्पन्न भएको छ।
कार्यक्रममा वक्ताहरूले सडक दुर्घटनाको प्रमुख कारण तीव्र गति भएको उल्लेख गर्दै राडर गनको प्रयोगलाई प्रभावकारी उपायका रूपमा प्रस्तुत गरे। उनीहरूको भनाइमा, राडर गनले सवारीसाधनको गति मापन गर्ने भएकाले तीव्र गतिमा सवारी चलाउने चालकलाई सजिलै पहिचान गर्न सकिन्छ र यसले दुर्घटना कम गर्ने सम्भावना उच्च हुन्छ।
यसका साथै, राडर गनबाट प्राप्त तथ्य प्रमाण कानूनी कारबाहीमा प्रयोग गर्न सकिने हुँदा चालकलाई नियम पालनामा थप प्रोत्साहन मिल्ने विश्वास गरिएको छ। यस उपकरणको प्रयोगले सडक सुरक्षा अभियानलाई मजबुत बनाउन र दीर्घकालीन सडक सुरक्षा अध्ययनका लागि आवश्यक तथ्याङ्क संकलन गर्न पनि सहज हुने वक्ताहरूको भनाइ छ।
कार्यक्रममा सहभागी स्थानीय बासिन्दा, ट्राफिक प्रहरी र सरोकारवालाहरूले राडर गनको प्रयोगले जनचेतना बढाउने र दुर्घटना न्यूनीकरणमा प्रत्यक्ष योगदान पुर्याउने विश्वास व्यक्त गरेका छन्।
