जामिर। मुगुको खत्याड गाउँपालिका–९ जामिरमा कर्खा जामिर देउसी–भैलो टिमले दशैँ तथा तिहारको अवसरमा देउसी–भैलो खेलेर संकलित रकमको सदुपयोग गर्दै सामूहिक भोज, खेलकुद तथा सांस्कृतिक कार्यक्रम आयोजना गरेको छ। मनोरञ्जनसँगै गाउँको साझा आवश्यकतालाई समेत प्राथमिकता दिँदै युवायुवतीहरूले देखाएको सक्रियता अहिले प्रशंसनीय बनेको छ।


दशैँ तथा तिहारको अवसरमा गाउँघरमा भेला भएका सम्पूर्ण युवायुवती, स्थानीयवासी तथा आफन्तजनलाई एकै ठाउँमा जम्मा गरी आत्मीयता साटासाट गर्ने उद्देश्यले कार्यक्रम आयोजना गरिएको हो। कार्यक्रममा गाउँका सबैजना मिलेर सामूहिक भोज खानुका साथै भलिबल खेल र परम्परागत देउडा खेलमार्फत भरपूर मनोरञ्जन लिएका थिए। लामो समयपछि गाउँमा भेला भएका साथीभाइ तथा आफन्तजनबीच भेटघाट, रमाइलो र आपसी सद्भाव साटासाट गर्ने अवसरसमेत बनेको थियो।


कार्यक्रममा प्रमुख अतिथिका रूपमा खत्याड गाउँपालिका वडा नम्बर ९ का वडा सदस्य पिउल बहादुर डाँगर उपस्थित हुनुहुन्थ्यो भने अतिथिका रूपमा जामिर टोल विकास समितिका अध्यक्ष नमराज तिवारीसहित गाउँका अन्य विशिष्ट व्यक्तित्वहरूको उपस्थिति रहेको थियो।
कार्यक्रमलाई सम्बोधन गर्दै प्रमुख अतिथि वडा सदस्य डाँगरले दशैँ तथा तिहारजस्ता चाडपर्वमा गाउँघरमा रहेका तथा बाहिरबाट गाउँ फर्किएका सबैलाई एकै ठाउँमा भेला गराएर सामूहिक भोज तथा मनोरञ्जनात्मक कार्यक्रम गर्नु अत्यन्तै सकारात्मक कार्य भएको बताउनुभयो। यस्ता कार्यक्रमले गाउँमा आपसी सद्भाव, एकता र भाइचाराको सम्बन्धलाई थप बलियो बनाउनुका साथै सबैबीच आत्मीयता बढाउने उहाँको भनाइ थियो।
त्यस्तै, जामिर टोल विकास समितिका अध्यक्ष नमराज तिवारीले पनि चाडपर्वको अवसरमा सबैजना एकै ठाउँमा भेला भएर सामूहिक रूपमा खानपिन गर्दै दुःखसुख साटासाट गर्नुले आपसी सम्बन्धलाई अझ प्रगाढ बनाउने बताउनुभयो। गाउँघरमा सबैजना भेला भएर पिकनिकको शैलीमा रमाइलो गर्दा मनका भावना साटासाट हुने र पुराना सम्बन्धसमेत थप आत्मीय बन्ने उहाँले धारणा व्यक्त गर्नुभयो।
यस कार्यक्रमको सबैभन्दा प्रशंसनीय पक्ष भनेको देउसी–भैलोबाट संकलित रकमलाई क्षणिक मनोरञ्जनमा मात्र सीमित नराखी गाउँको साझा आवश्यकतामा समेत सदुपयोग गर्नु हो। टिमले करिब १० देखि १२ हजार रुपैयाँ बराबरका थाली खरिद गरी गाउँमा राख्ने व्यवस्था गरेको छ। गाउँघरमा विवाह, व्रतबन्धलगायतका सामाजिक तथा सांस्कृतिक कार्यक्रम हुँदा आवश्यकताअनुसार ती थाली प्रयोग गर्न सकिनेछ। त्यसैगरी, गाउँमा हुने विभिन्न कार्यक्रमलाई सहज र व्यवस्थित बनाउन डिजेसमेत खरिद गरिएको छ।
यसरी चाडपर्वको अवसरमा देउसी–भैलो खेलेर संकलन भएको रकमबाट गाउँका लागि आवश्यक सामग्रीको व्यवस्था गर्नुले कर्खा जामिर देउसी–भैलो टिमको सामाजिक उत्तरदायित्व र सामूहिक भावनालाई समेत उजागर गरेको छ। व्यक्तिगत मनोरञ्जनभन्दा माथि उठेर गाउँको साझा हितका लागि सोच्नु युवायुवतीहरूको सकारात्मक र अनुकरणीय प्रयास हो।
कर्खा जामिरका युवायुवतीहरूको सक्रिय सहभागिता, आयोजकको राम्रो व्यवस्थापन तथा स्थानीयवासीको साथ र सहयोगमा सम्पन्न कार्यक्रमले गाउँमा उत्साहपूर्ण वातावरण सिर्जना गरेको थियो। सामूहिक भोज, भलिबल, देउडा र देउसी–भैलोको माध्यमबाट संस्कृति, मनोरञ्जन र सामाजिक एकतालाई जोड्ने यो प्रयासले आगामी दिनमा पनि यस्ता रचनात्मक गतिविधिलाई निरन्तरता दिन प्रेरणा दिने विश्वास गरिएको छ।
देउसी–भैलो खेलेर रमाइलो गर्ने मात्र होइन, त्यसबाट संकलित रकम गाउँकै साझा आवश्यकतामा खर्च गर्ने कर्खा जामिर देउसी–भैलो टिमको यो पहल साँच्चिकै प्रशंसनीय छ। यसले गाउँको एकता, आपसी सद्भाव र सामूहिक विकासका लागि युवापुस्ताले चाहेमा सकारात्मक परिवर्तनको सुरुवात आफ्नै गाउँबाट गर्न सक्छन् भन्ने सन्देश दिएको छ।






