काठमाडौँ, भदौ २५, २०८२ – भाद्र २३ र २४ गते देशका विभिन्न भागमा जेनजी पुस्ताको प्रदर्शन र त्यसपश्चात उत्पन्न परिस्थितिको अनुगमनलाई राष्ट्रिय मानव अधिकार आयोग (एनएचआरसी) ले निरन्तरता दिइरहेको छ।
आयोगले प्रदर्शनपछिको निषेधाज्ञा अवधिमा मृतकका परिवार र घाइतेहरूको अवस्थाबारे बुझ्ने कार्यलाई निरन्तरता दिएको जनाएको छ। साथै, मानव अधिकारकर्मी, सञ्चारकर्मी र अत्यावश्यक सेवाप्रदायकलाई सहज आवागमनमा सहयोग गर्न सम्बन्धित निकायलाई आग्रह गरेको छ।
हिंसा र क्षतिप्रति चिन्ता
विगत दुई दिनमा भएका हिंसात्मक गतिविधि, आगजनी र तोडफोडका कारण ठूलो जनधनको क्षति भएको भन्दै आयोगले यस घटनाप्रति दुःख व्यक्त गरेको छ। आयोगले अब यस्ता घटना दोहोरिन नदिन र कसैले पनि हिंसात्मक कार्य नगर्न–नगराउन सबैलाई आह्वान गरेको छ।
संयम र जिम्मेवारीको खाँचो
देश विषम अवस्थामा रहेको वर्तमान सन्दर्भमा सबै पक्ष संयमित रहनुपर्ने आयोगको भनाइ छ। विज्ञप्तिमा भनिएको छ, “सबै पक्षले देश र जनताप्रतिको जिम्मेवारी मनन गर्दै वर्तमान अन्यौलताको अवस्थाबाट अगाडि बढ्नु आवश्यक छ।”
लोकतान्त्रिक प्रक्रियामार्फत समाधान
आयोगले लोकतन्त्रको विकल्प लोकतन्त्र मात्रै भएको दोहोर्याउँदै जनताका हक अधिकारलाई सुरक्षित गर्दै लोकतान्त्रिक विधि र प्रक्रियाबाटै राजनीतिक निकास खोज्नुपर्नेमा जोड दिएको छ।
सबैलाई सकारात्मक भूमिकाको आग्रह
सङ्कटको यस घडीमा स्थितिलाई सामान्य बनाउन राज्यका निकायदेखि आम नागरिकसम्म सबैको सकारात्मक र सक्रिय भूमिका अपरिहार्य भएको आयोगको भनाइ छ।
प्रवक्ता डा. टीकाराम पोखरेल द्वारा जारी विज्ञप्तिमा भनिएको छ कि आयोग यस प्रक्रियामा आफ्नो आवश्यक भूमिका निर्वाह गर्न सदैव तत्पर रहनेछ।
