बाँके, कोहलपुर ।
मिति २०८२ साल भदौ २३ र २४ गते भएको ZenZ आन्दोलनपछि राजस्व अनुसन्धान कार्यालय कोहलपुरबाट हराएको बहुमूल्य धातु र नगद इलाका प्रहरी कार्यालय कोहलपुरले फिर्ता गरेको छ। सचेत युवाहरु र प्रहरीको सक्रिय पहलपछि फेला पारिएको सम्पत्ति भदौ ३० गते स्थानीय जनप्रतिनिधिहरुको रोहवरमा औपचारिक रूपमा बुझाइएको हो।

प्रहरीका अनुसार फेला परेको सम्पत्तिमा दुई लाख बाह्र हजार छ सय छब्बिस रुपैयाँसहित भारतीय र नेपाली मुद्रा, चार सय एकाइस दशमलव बत्तीस ग्राम सुन र नौ केजी नौ सय चौरासी ग्राम चाँदी रहेका छन्। यी सबै सामग्रीलाई कानूनी प्रक्रिया अनुसार सुरक्षित राखिएको र आवश्यक अनुसन्धान अघि बढाइने प्रहरीले जनाएको छ।

स्थानीय युवाहरुको सक्रियता र प्रहरीको तत्परताले हराएको सम्पत्ति छोटो समयमा नै फेला पार्न सहयोग पु–याएको भन्दै सर्वसाधारणले प्रसंसा गरेका छन्। यस घटनाले समुदाय र सुरक्षाकर्मीबीचको सहकार्यले ठुला संकटसमेत समाधान गर्न सकिन्छ भन्ने देखाएको स्थानीयको भनाइ छ।