बाँके । पछिल्ला दिनमा बाँकेको डुडुवा गाउँपालिकामा अशान्ति र अव्यवस्था बढ्दै गएको छ । पालिकामा तोडफोड, लफडा र अवाञ्छित गतिविधिमा दल–सम्बद्ध गिराेहहरूको सक्रियता देखिएको स्थानीयवासीहरूले बताएका छन् ।

यस कारण पालिकाबाट नागरिकले सहज रूपमा सेवा–सुविधा लिन नसक्ने अवस्था सिर्जना भएको छ । तर स्थानीयवासीहरूले भने यो अशान्ति हालैको Gen-Z आन्दोलनसँग सम्बन्धित नभई राजनीति र व्यक्तिगत पूर्वाग्रही सोचका कारण उत्पन्न भएको बताएका छन् ।

एमाले र जसपाका नेताको संलग्नता आरोप

सामाजिक सञ्जालमा भाइरल भएका तस्बिर तथा भिडियोहरूले यो घटनामा एमाले निकट भनिएका पूर्व सांसद समृत रहेका विजय यादव र जसपाका नेता भण्डारी लाल यादव संलग्न रहेको देखाएको बताइएको छ ।

विकास कार्यमा अवरोध

काङ्ग्रेसका नेता नरेन्द्र चौधरीको नेतृत्वमा रहेको डुडुवा गाउँपालिकाले विकासको फड्को मार्दै गर्दा राजनीतिक पूर्वाग्रहका कारण गरिएको अशान्तिले पूर्वाधार निर्माणदेखि सेवा प्रवाहमा असर पारेको स्थानीयवासीको भनाइ छ ।

जनप्रतिनिधिको आवासमा घुसपैठ

गाउँपालिका प्रमुखका लागि पालिकामा आवास व्यवस्था भए पनि केही अराजक समूहले बिना अनुमति चौधरीको आवासमै छिरेर चरित्र हत्या गर्ने र पालिकालाई बदनाम गर्ने कार्य गरेको स्थानीय स्रोतले दाबी गरेको छ । उनका अनुसार, यी सबै गतिविधि पालिका अध्यक्षलाई लक्षित गरेर गरिएको सुनियोजित योजना हुन् ।

पालिकाको तयारी

यसबीच, डुडुवा गाउँपालिकाले अशान्ति मच्चाउने नेता र दल–निकट कार्यकर्ताहरूको नामसूची तयार पारिरहेको पालिका स्रोतले जानकारी दिएको छ । केही साताभित्रै तोडफोड, आगजनी प्रयासलगायतका घटनामा संलग्नविरुद्ध उजुरी दर्ता गरिने जनाइएको छ ।