रुपन्देहीको सिद्धार्थनगर–५ स्थित निर्माणा होटल परिसरमा मंगलबार दिउँसो एक जना माथि गोली प्रहार भएको छ। स्टार क्यासिनोमा कार्यरत २७ वर्षीय सेक्युरिटी गार्ड मीनबहादुर परियारको दाहिने खुट्टामा गोली लागेको प्रहरीले जनाएको छ।
घटना त्यतिबेला भएको हो जब वडा–३ दरखसवाका ३२ वर्षीय सञ्जय गुप्ता मोटरसाइकलमा होटल परिसरबाट निस्किँदै थिए। भारतीय मूलका जस्तै देखिने दुई जनाले मोटरसाइकल लडाएर कुटपिट गरेका थिए। सो क्रममा गोली चल्दा परियार घाइते भएका हुन्।
परियारलाई भिम अस्पताल लगिएको र अहिले सामान्य अवस्थामा रहेको छ। गोली प्रहार गर्नेहरु फरार छन्। घटनापछि डेढ सयभन्दा बढी प्रहरी परिचालन गरी रुपन्देहीका सबै नाकामा कडा निगरानी गरिएको छ। प्रहरीले मोटरसाइकल चालक गुप्तासहित १७ जनालाई नियन्त्रणमा लिएर सोधपुछ गरिरहेको छ।
