काठमाडौं ।भोटेकोशी नदीमा आएको विनाशकारी बाढीका क्रममा कर्तव्य पालनामा खटिएका नेपाल प्रहरीका प्रभावित कर्मचारी तथा उनीहरूका परिवारलाई लक्षित गर्दै नेपाल प्रहरीले महत्वपूर्ण राहत तथा कल्याणकारी निर्णय गरेको छ।
मिति २०८३ भदौ १० गते रसुवा जिल्लास्थित भोटेकोशी नदीमा आएको बाढीबाट प्रत्यक्ष प्रभावित नेपाल प्रहरीका कर्मचारी तथा परिवारजनको दीर्घकालीन हितलाई ध्यानमा राख्दै २०८३ असोज १२ गते बसेको नेपाल प्रहरी नीति निर्माण समितिको उच्चस्तरीय बैठकले विशेष निर्णय गरेको हो।
निर्णयअनुसार बाढीबाट प्रत्यक्ष प्रभावित २८ जना नेपाल प्रहरी कर्मचारीका सन्ततिहरूलाई प्राथमिक तहदेखि स्नातकोत्तर (Masters Level) तहसम्मको शिक्षा पूर्ण रूपमा निःशुल्क उपलब्ध गराइनेछ। यस व्यवस्थाले विपद्का कारण पारिवारिक तथा आर्थिक कठिनाइमा परेका प्रहरी परिवारका बालबालिकाको शिक्षालाई निरन्तरता दिन महत्वपूर्ण सहयोग पुग्ने अपेक्षा गरिएको छ।
शैक्षिक सहयोगसँगै प्रभावित प्रहरी परिवारका अन्य सदस्यहरूको जीविकोपार्जन र दीर्घकालीन पुनःस्थापनालाई समेत प्राथमिकतामा राखिएको छ। उनीहरूको आवश्यकता र क्षमताका आधारमा सीपमूलक तथा व्यावसायिक तालिम उपलब्ध गराई रोजगारीको उचित व्यवस्था मिलाउने निर्णयसमेत समितिले गरेको छ।
कर्तव्य पालनाका क्रममा जोखिमपूर्ण परिस्थितिको सामना गर्दै राष्ट्र र जनताको सुरक्षामा खटिने प्रहरी कर्मचारी तथा उनीहरूका परिवारप्रति संस्थागत जिम्मेवारी निर्वाह गर्ने उद्देश्यले यस्तो निर्णय गरिएको नेपाल प्रहरीले जनाएको छ।
विपद्का बेला ड्युटीमा खटिएका प्रहरी कर्मचारीले आफ्नो व्यक्तिगत सुरक्षा र पारिवारिक चिन्ताभन्दा माथि उठेर नागरिकको उद्धार तथा सुरक्षालाई प्राथमिकता दिने गरेका छन्। त्यही योगदानको मूल्यांकन गर्दै शिक्षा, सीप र रोजगारीमार्फत प्रभावित परिवारलाई दीर्घकालीन रूपमा आत्मनिर्भर बनाउने उद्देश्यले गरिएको यो निर्णयले प्रहरी कल्याणको दायरालाई राहतबाट पुनःस्थापना र आत्मनिर्भरतासम्म विस्तार गरेको देखिन्छ।
विशेषगरी बाढीका कारण प्रभावित परिवारका सन्ततिलाई उच्च शिक्षासम्म निःशुल्क अध्ययनको अवसर प्रदान गर्ने तथा परिवारका सदस्यलाई सीप र रोजगारीसँग जोड्ने निर्णयले विपद्पछिको पुनःस्थापनालाई थप व्यवस्थित बनाउने अपेक्षा गरिएको छ।