कोहलपुर । नेपाल औषधि व्यवसायी संघ, जिल्ला शाखा बाँकेले कोहलपुर नगरपालिका–११ स्थित थापा मेडिकल हलका सञ्चालक गणेशबहादुर थापामाथि भएको भनिएको हातपात, कुटपिट, गालीगलौज तथा सामाजिक सञ्जालमार्फत गरिएको प्रचारप्रति गम्भीर ध्यानाकर्षण भएको जनाएको छ।
संघले जारी गरेको प्रेस विज्ञप्तिअनुसार, औषधि उपचारका क्रममा संवेदनशील अंग छोएको आरोप लगाउँदै थापामाथि हातपात तथा अभद्र व्यवहार गरिएको र घटनासम्बन्धी सामग्री सामाजिक सञ्जालमा समेत प्रसारण गरिएको जनाइएको छ। संघले उक्त घटनाप्रति घोर भर्त्सना गर्दै आरोपको सत्यतथ्य निष्पक्ष छानबिनबाट मात्रै बाहिर ल्याउनुपर्नेमा जोड दिएको छ।
संघले औषधि व्यवसायीले प्रचलित कानुनको अधीनमा रही स्वास्थ्य सेवासँगै राज्यको समग्र विकासमा योगदान दिँदै आएको उल्लेख गरेको छ। व्यवसाय सञ्चालनका क्रममा कुनै व्यक्ति वा समूहले औषधि पसलमा प्रवेश गरी गैरकानुनी रूपमा हातपात, कुटपिट वा अभद्र व्यवहार गर्नुले व्यवसायीको सुरक्षामाथि गम्भीर प्रश्न उठाएको संघको भनाइ छ।
घटनामा लगाइएको आरोप पुष्टि नभएसम्म कसैको व्यक्तिगत तथा व्यावसायिक चरित्रमाथि प्रश्न उठाउने गरी सामाजिक सञ्जालमा सामग्री प्रसारण गर्नु उचित नभएको संघले जनाएको छ। आरोपको निष्पक्ष छानबिन गरी वास्तविकता सार्वजनिक गर्नुपर्ने र दोषी देखिए कानुनी कारबाहीको प्रक्रिया अघि बढाउनुपर्ने संघको माग छ।
संघका अनुसार, औषधि व्यवसायीमाथि भएको भनिएको हातपात, कुटपिट, अभद्र व्यवहार तथा सामाजिक सञ्जालमार्फत गरिएको प्रचारका विषयमा सम्बन्धित व्यक्तिमाथि कानुनी कारबाही गर्न तथा औषधि व्यवसायीको व्यक्तिगत एवं व्यावसायिक सुरक्षाको प्रत्याभूति गर्न स्थानीय प्रशासनसँग जोडदार माग गरिएको छ।
संघका कार्यवाहक अध्यक्ष पवनकुमार बानियाँ र सचिव पुण्यदेव गिरीद्वारा जारी विज्ञप्तिमा घटनाको निष्पक्ष छानबिन, आरोप र प्रमाणबीच स्पष्ट भिन्नता तथा कानुनी प्रक्रियाको पालना गर्नुपर्नेमा जोड दिइएको छ।
नोट : यस घटनामा युवतीले लगाएको आरोप र संघले व्यक्त गरेको दाबीलाई पुष्टि भएको तथ्यका रूपमा नभई सम्बन्धित पक्षका भनाइका रूपमा प्रस्तुत गरिएको छ। घटनाको वास्तविकता भने सम्बन्धित निकायको निष्पक्ष छानबिनपछि मात्रै स्पष्ट हुनेछ।