काठमाडौं । काठमाडौंको सुन्धारास्थित केन्द्रीय कारागारबाट एक महिला कैदी फरार भएकी छन्।
फरार हुनेमा नुवाकोटको विदुर नगरपालिका घर भएकी २५ वर्षीया सपना तामाङ रहेको प्रहरीले जनाएको छ। महिला ब्लकमा रहेकी तामाङ शुक्रबार बिहान करिब साढे १ बजे कारागारको कम्पाउन्ड पर्खाल नाघेर फरार भएकी हुन्।
कारागार प्रमुख तथा कारागार प्रशासक कृष्ण चापागाईंका अनुसार तामाङ चोरी, शरीर बन्धक तथा ज्यान मार्ने उद्योगसम्बन्धी मुद्दामा जन्मकैदको सजाय भोगिरहेकी थिइन्।
प्रारम्भिक अनुसन्धानअनुसार उनले झ्यालबाट चढेर पर्खाल नाघ्दै भागेको खुलेको छ। यस घटनापछि सुरक्षा व्यवस्थामाथि समेत प्रश्न उठेको छ।
यसअघि जेनजी आन्दोलनको समयमा पनि फरार भएकी तामाङ दुई महिनापछि पक्राउ परेकी थिइन्।
प्रहरीले फरार तामाङको खोजीकार्य तीव्र पारिएको जनाएको छ भने घटनाबारे थप अनुसन्धान भइरहेको बताएको छ।