धनगढी । कैलालीको टीकापुरस्थित इलाका प्रहरी कार्यालयको हिरासतबाट फरार भएका लागूऔषध मुद्दाका थुनुवा संजय नगार्जी अझै पक्राउ पर्न सकेका छैनन्।
टीकापुर नगरपालिका–१ निवासी ३१ वर्षीय नगार्जी आइतबार राति प्रहरी हिरासतबाट फरार भएका थिए। उनको खोजीका लागि नेपाल प्रहरीले व्यापक रूपमा खोजतलास जारी राखेको जनाएको छ।
जिल्ला प्रहरी कार्यालय कैलालीका अनुसार लागूऔषध सम्बन्धी मुद्दामा असार ९ गते पक्राउ परेका नगार्जी अनुसन्धानका लागि हिरासतमा थिए। आइतबार राति पानी खाने बहाना बनाएर हिरासतबाट बाहिर निस्किएका उनले ड्युटीमा रहेका प्रहरी कर्मचारीलाई धकेलेर फरार भएको प्रहरीले जनाएको छ।
घटनापछि फरार अभियुक्तको खोजी तीव्र पारिनुका साथै घटनाको आन्तरिक छानबिनसमेत सुरु गरिएको छ। जिल्ला प्रहरी कार्यालय कैलालीले प्रहरी नायब उपरीक्षक (डीएसपी) योगेन्द्र तिमिल्सिनाको नेतृत्वमा पाँच सदस्यीय छानबिन समिति गठन गरेको जनाएको छ।
यस्तै, थुनुवा फरार हुँदा ड्युटीमा रहेका प्रहरी जवान लली भण्डारीलाई निलम्बन गरिएको छ। घटनाबारे थप अनुसन्धान जारी रहेको प्रहरीले जनाएको छ।
