उदयपुर । डिभिजन वन कार्यालय उदयपुरका सूचना अधिकारी तथा सातौँ तहका वन अधिकृत भुवन पौडेल घुस रकमसहित रङ्गेहात पक्राउ परेका छन्।
अख्तियार दुरुपयोग अनुसन्धान आयोगको कार्यालय, इटहरीबाट खटिएको टोलीले पौडेललाई बिहीबार साँझ १६ हजार २५० रुपैयाँ नगदसहित कार्यालयबाटै पक्राउ गरेको हो।
विशेष सूचनाका आधारमा डिभिजन वन कार्यालय पुगेको अख्तियारको टोलीले निगरानी बढाउने क्रममा पौडेललाई घुस रकमसहित पक्राउ गरेको जनाइएको छ।
पौडेलले एक सामुदायिक वन उपभोक्ता समूहसँग सम्बन्धित काम सहज रूपमा गरिदिने भन्दै सेवाग्राहीबाट १६ हजार २५० रुपैयाँ घुस लिएको आरोप छ।
पक्राउ परेका पौडेलमाथि आवश्यक अनुसन्धान अघि बढाइएको अख्तियारले जनाएको छ। घटनाबारे थप कानुनी प्रक्रिया समेत अगाडि बढाइएको छ।
