काठमाडौं । अख्तियार दुरुपयोग अनुसन्धान आयोग ले बैंकिङ कसुरसम्बन्धी मुद्दामा जाहेरवालाको रकम फिर्ता दिलाइदिने भन्दै घुस लिएको आरोपमा प्रहरी नायब निरीक्षकविरुद्ध भ्रष्टाचार मुद्दा दायर गरेको छ।
आयोगले प्रहरी वृत्त मालीगाउँ, काठमाडौंमा कार्यरत प्रहरी नायब निरीक्षक दिनेश राउत विरुद्ध शुक्रबार विशेष अदालतमा मुद्दा दायर गरेको जनाएको हो।
आयोगका अनुसार राउतले बैंकिङ कसुरसम्बन्धी मुद्दामा जाहेरवालाको रकम फिर्ता गराइदिने तथा मुद्दा मिलाइदिने आश्वासन दिँदै सेवाग्राहीसँग २० हजार रुपैयाँ घुस लिएको पाइएको थियो।
घुस लिइरहेको अवस्थामा आयोगको टोलीले केही दिनअघि उनलाई पक्राउ गरेको थियो। अनुसन्धानपछि आयोगले भ्रष्टाचार निवारण ऐन, २०५९ बमोजिम कैद सजाय र जरिवानाको माग गर्दै मुद्दा दायर गरेको जनाएको छ।