भक्तपुर । चाँगुनारायण नगरपालिका–९ ताथलीबाट साढे एक किलो चाँदीसहित एक जना पक्राउ परेका छन् ।
पक्राउ पर्नेमा इन्द्रावती गाउँपालिका–१० स्थायी घर भई हाल बनेपा नगरपालिका–८ पुल बजार बस्दै आएका ३२ वर्षीय राजु स्वेत रहेका छन् ।
प्रहरीका अनुसार सोमबार अपराह्न प्रदेश ३–०२–०१२ प ४३६४ नम्बरको मोटरसाइकलमा नालाबाट च्यामासिंहतर्फ आउँदै गरेका स्वेतलाई शंकास्पद अवस्थामा जाँच गरिएको थियो । जाँचका क्रममा उनले बोकेको झोलाबाट करिब साढे एक किलो चाँदी बरामद गरिएको प्रहरीले जनाएको छ ।
सोधपुछका क्रममा बरामद चाँदी सम्बन्धी कुनै कागजात प्रस्तुत गर्न नसकेपछि उनलाई नियन्त्रणमा लिइएको प्रहरीले बताएको छ ।
हाल उनलाई नेपाल प्रहरीको प्रहरी वृत्त जगाती, भक्तपुरमा राखेर थप अनुसन्धान भइरहेको छ ।