काठमाडौं । सरकारी छाप दस्तखत कीर्ते मुद्दाका फरार प्रतिवादी पक्राउ परेका छन्। प्रहरीले सरकारी कागजात कीर्ते गरेको अभियोगमा फरार रहेका एक व्यक्तिलाई काठमाडौंबाट पक्राउ गरेको हो।
प्रहरी प्रधान कार्यालयका अनुसार पक्राउ पर्नेमा ललितपुर महानगरपालिका–३ आदर्शटोल बस्ने ६१ वर्षीय क्रोडी फ्रेच क्षेत्री भनिने फरदिनान्द भ्यालेन्टाईन फेट्ज रहेका छन्।
प्रहरीका अनुसार फेट्जले आफ्नै छोरीको कक्षा ११ र १२ उत्तीर्ण भएको नक्कली ट्रान्सक्रिप्ट लगायतका कागजात तयार गरी सरकारी छाप तथा दस्तखत कीर्ते गरेको आरोपमा मुद्दा दर्ता भएको थियो।
जिल्ला अदालत भक्तपुरले २०८२ वैशाख ३ गतेको फैसलामार्फत उनलाई १ वर्ष कैद तथा ५० हजार रुपैयाँ जरिवाना सजाय सुनाएको थियो। फैसला पछि फरार रहेका उनलाई काठमाडौं उपत्यका अपराध अनुसन्धान कार्यालय टेकुको टोलीले काठमाडौं महानगरपालिका–९ तिलगंगाबाट पक्राउ गरेको प्रहरीले जनाएको छ।
पक्राउ परेका फेट्जलाई फैसला कार्यान्वयनका लागि जिल्ला अदालत भक्तपुरमा पेश गरिएको प्रहरीले जनाएको छ।