काठमाडौं । अख्तियार दुरुपयोग अनुसन्धान आयोगले मालपोत कार्यालय भैरहवा, रुपन्देहीमा कार्यरत नायव सुब्बा ओम बहादुर खाम्चाविरुद्ध २ लाख रुपैयाँ घुस लिएको आरोपमा विशेष अदालतमा मुद्दा दायर गरेको छ।
आयोगका अनुसार जग्गाको नयाँ श्रेष्ता कायम तथा नामसारी गर्ने प्रयोजनका लागि सेवाग्राहीसँग घुस मागिएको भन्ने उजुरीपछि अख्तियारको बुटवल कार्यालयबाट खटिएको टोलीले खाम्चालाई सेवाग्राहीबाट २ लाख रुपैयाँ घुस लिइसकेको अवस्थामा नियन्त्रणमा लिएको थियो।
अनुसन्धानका क्रममा नायव सुब्बा खाम्चाले जिर्ण श्रेष्ता कायम गरी अपुताली जग्गा नामसारी दाखिला गरिदिएबापत सेवाग्राहीसँग मोलमोलाइ गर्दै २ लाख रुपैयाँ घुस लिएको पुष्टि भएको आयोगले जनाएको छ।
अख्तियारका प्रवक्ता सुरेश न्यौपानेका अनुसार भ्रष्टाचार निवारण ऐन, २०५९ अन्तर्गत कसुर कायम गर्दै बिगो बराबर २ लाख रुपैयाँ जरिवाना तथा कैद सजायको मागसहित विशेष अदालतमा आरोपपत्र दायर गरिएको छ।