काठमाडौं । गृह मन्त्रालयले ६ जना सहसचिवको सरुवा गर्दै विभिन्न जिल्लाका प्रमुख जिल्ला अधिकारी (सीडीओ) परिवर्तन गरेको छ। मंगलबार गरिएको सरुवासँगै ललितपुर, भक्तपुर, दाङ, सिन्धुपाल्चोक, रुपन्देही लगायत जिल्लामा नयाँ सीडीओ खटिएका हुन्।
सरुवा अनुसार नरहरी घिमिरेलाई ललितपुर, विनोद कुमार खड्कालाई भक्तपुर, निश्चलराज पाण्डेलाई दाङ, शशीधर घिमिरेलाई सिन्धुपाल्चोक तथा विश्वप्रकाश अर्याललाई रुपन्देहीको प्रमुख जिल्ला अधिकारीको जिम्मेवारी दिइएको छ।
यस्तै रुपन्देहीका प्रमुख जिल्ला अधिकारी रहेका सहसचिव माधव प्रसाद पोखरेललाई कारागार व्यवस्थापन विभागको महानिर्देशकको जिम्मेवारी दिइएको गृह मन्त्रालयले जनाएको छ।
यसैबीच मन्त्रालयले दुई उपसचिवको पनि सरुवा गरेको छ। सरुवा अनुसार उपसचिव निशानराज गौतमलाई जिल्ला प्रशासन कार्यालय रुकुम पश्चिम पठाइएको छ भने रुकुम पश्चिमका प्रमुख जिल्ला अधिकारी दिनेश प्रसाद थानीलाई गृह मन्त्रालयमा तानिएको छ।
मंगलबारको सरुवासँगै ६ जिल्लाका प्रमुख जिल्ला अधिकारी फेरिएका छन्।