काठमाडौं । समाचार प्रकाशनसँग सम्बन्धित विषयलाई लिएर वरिष्ठ पत्रकार किशोर श्रेष्ठमाथि प्रहरीले निगरानी गर्दै धरपकडको प्रयास गरेको तथा विभिन्न व्यक्तिबाट धम्की दिइएको घटनाप्रति नेपाल पत्रकार महासंघले गम्भीर ध्यानाकर्षण जनाएको छ।
महासंघ काठमाडौं शाखाका अनुसार केही दिनअघि जनआस्था साप्ताहिक र जनआस्था डटकम मा मन्त्री तथा सत्तारुढ दलका नेतासम्बन्धी आलोचनात्मक समाचार प्रकाशित भएपछि प्रधान सम्पादक श्रेष्ठले यस्तो व्यवहार सामना गर्नुपरेको हो।
प्रेस काउन्सिल नेपालका पूर्वअध्यक्षसमेत रहेका श्रेष्ठले गृह मन्त्रालयको जिम्मेवारी सम्हालिरहेका प्रधानमन्त्रीको निर्देशनमा आफूलाई धरपकड गर्ने, धम्क्याउने तथा समाचारको स्रोत खुलाउन दबाब दिने गतिविधि बढिरहेको जानकारी महासंघलाई गराएका छन्।
नेपाल पत्रकार महासंघले समाचार लेखेकै आधारमा पत्रकार श्रेष्ठमाथि भइरहेको व्यवहार स्वतन्त्र प्रेस र लोकतन्त्रमाथिको प्रहार भएको जनाएको छ। महासंघले यस्ता गतिविधिको निन्दा गर्दै प्रेसविरोधी व्यवहार तत्काल सच्याउन सम्बन्धित पक्षसँग माग गरेको छ।
महासंघले समाचारप्रति असहमति भए प्रेस काउन्सिल नेपालमार्फत समाधान खोज्न आग्रह गर्दै पत्रकार श्रेष्ठलाई धम्क्याउने व्यक्तिको पहिचान गरी तत्काल कानुनी कारबाही गर्न समेत जोडदार माग गरेको छ।
महासंघका महासचिव रामप्रसाद दाहालद्वारा जारी विज्ञप्तिमा प्रेस स्वतन्त्रताको सम्मान गर्न सबै पक्षलाई आग्रह गरिएको छ।
