सुर्खेत । जिल्ला प्रहरी कार्यालय सुर्खेतको हिरासतमा रहेका एक जना थुनुवाको मृत्यु भएको छ।
मृत्यु हुनेमा वीरेन्द्रनगर नगरपालिका–१० निवासी २१ वर्षीय साकिर बक्स रहेका छन्। उनी चोरीसम्बन्धी मुद्दामा गत जेठ २७ गते पक्राउ परेर प्रहरी हिरासतमा रहेका थिए।
जिल्ला प्रहरी कार्यालय सुर्खेतका प्रहरी नायब उपरीक्षक कविन्द्र सिंह बोहराका अनुसार शनिबार बिहान हिरासतमा रहेका बक्सको स्वास्थ्यमा अचानक समस्या देखिएको थियो। त्यसपछि उनलाई उपचारका लागि प्रदेश अस्पताल सुर्खेत लगिएको थियो।
प्रहरीका अनुसार बिहान करिब ५ः३० बजे अस्पताल पुर्याइएका बक्सलाई चिकित्सकले मृत घोषणा गरेका थिए।
हालसम्म उनको मृत्युको कारण खुल्न नसकेको प्रहरीले जनाएको छ। घटनाबारे आवश्यक अनुसन्धान भइरहेको र मृत्युको वास्तविक कारण पोस्टमार्टम प्रतिवेदनपछि खुल्ने प्रहरीको भनाइ छ।
