कोहलपुर । बाँकेको कोहलपुर नगरपालिका–१५ चनहवा गाउँबाट प्रहरीले लागुऔषध (ब्राउन सुगर) सहित दुई जनालाई पक्राउ गरेको छ।
जिल्ला प्रहरी कार्यालय बाँकेका अनुसार असार ६ गते इलाका प्रहरी कार्यालय कोहलपुर र लागुऔषध नियन्त्रण ब्यूरो शाखा कार्यालय नेपालगञ्जबाट खटिएको संयुक्त प्रहरी टोलीले कोहलपुर–१५ निवासी ३२ वर्षीय राम प्रकाश थारु र ३३ वर्षीय कर्ण थारुलाई पक्राउ गरेको हो।
प्रहरीले उनीहरूको साथबाट शुद्ध तौल ३ ग्राम ७० मिलिग्राम ब्राउन सुगर जस्तो देखिने खैरो पदार्थ बरामद गरेको जनाएको छ।
पक्राउ परेका दुवै जनाविरुद्ध लागुऔषध सम्बन्धी कसुरमा बाँके जिल्ला अदालतबाट ७ दिनको म्याद थप अनुमति लिई थप अनुसन्धान भइरहेको जिल्ला प्रहरी कार्यालय बाँकेले जनाएको छ।