माडी – चितवनको माडी नगरपालिकास्थित बघौडा अस्पतालमा स्वास्थ्यकर्मीमाथि आक्रमण भएको घटनामा चार जना पक्राउ परेका छन्।
गत बिहीबार राति चार–पाँच जनाको समूहमा आएका युवाहरूले चिकित्सक र स्वास्थ्यकर्मीमाथि अस्पताल परिसरभित्रै मादक पदार्थ सेवन गरी कुटपिट गरेका थिए। घाइतेमा डा.दीपेन्द्र विश्वास, डा.देवेन्द विश्वास, हे.अ. अनुप सुवेदी, र कविराज तिवारी रहेका छन्।
घटनापछि शुक्रबार अस्पतालले इलाका प्रहरी कार्यालय माडीमा निवेदन दिएको थियो। निवेदनका आधारमा प्रहरीले चारजनालाई पक्राउ गरेको हो। पक्राउ पर्नेमा किरण खाती, सङ्गम तिवारी, विकास गुरुङ र प्रकाश गौतम रहेका छन्।
प्रहरीका अनुसार उनीहरूमाथि कानुनअनुसार कारबाही प्रक्रिया अघि बढाइएको छ।
