०१ फागुन २०८२ कोहलपुर, बाँके ;- मध्यपश्चिम विश्वविद्यालय अन्तर्गतको आङ्गिक क्याम्पस वागेश्वरी बहुमुखी क्याम्पसमा आयोजित अन्तरक्रिया तथा विद्यार्थी अभिमुखीकरण कार्यक्रममा स्ववियु सभापति देबेन्द्र बहादुर बुढाले विद्यार्थीहित र शैक्षिक वातावरण सुदृढीकरणका विषयमा स्पष्ट धारणा राख्दै सशक्त प्रतिबद्धता व्यक्त गर्नुभएको छ।
क्याम्पस प्राङ्गणमा सम्पन्न कार्यक्रममा बोल्दै सभापति बुढाले क्याम्पसमा अध्ययनरत सम्पूर्ण विद्यार्थीहरूको हक–हित संरक्षण, गुणस्तरीय शिक्षाको सुनिश्चितता तथा स्वस्थ शैक्षिक वातावरण निर्माण आफ्नो प्राथमिकता रहेको बताउनुभयो। उहाँले भन्नुभयो, “विद्यार्थीहरूको आवाज नै स्ववियुको आधार हो। हाम्रा हरेक कदम विद्यार्थीको भविष्य निर्माणतर्फ केन्द्रित हुनेछन्।”
उहाँले नवप्रवेशी विद्यार्थीहरूलाई विश्वविद्यालय जीवन अवसर र चुनौतीको संगम भएको उल्लेख गर्दै आत्मविश्वास, अनुशासन र निरन्तरतासहित अघि बढ्न आग्रह गर्नुभयो। साथै, क्याम्पसभित्र कुनै पनि समस्या उत्पन्न भए स्ववियु सधैं समाधानका लागि अग्रसर रहने प्रतिबद्धता व्यक्त गर्नुभयो।
सभापति बुढाले खेलकुद, साहित्य, अनुसन्धान तथा अन्य अतिरिक्त क्रियाकलापमा विद्यार्थीहरूको सहभागिता बढाउन स्ववियुले विभिन्न कार्यक्रम सञ्चालन गर्ने जानकारी दिनुभयो। “क्याम्पस केवल कक्षाकोठामा सीमित हुँदैन, यहाँबाट नेतृत्व, सहकार्य र सामाजिक उत्तरदायित्व सिकिन्छ,” उहाँले भन्नुभयो।
कार्यक्रममा प्राध्यापक, कर्मचारी तथा उल्लेखनीय संख्यामा विद्यार्थीहरूको उपस्थिति रहेको थियो। सहभागीहरूले सभापति बुढाको नेतृत्वप्रति विश्वास व्यक्त गर्दै विद्यार्थीमैत्री वातावरण निर्माणमा स्ववियुको भूमिका सकारात्मक रहेको धारणा राखेका थिए।
