काठमाडौं । नेपाल कम्युनिष्ट पार्टी (एमाले) का नेता बेद बहादुर गुरुङले आगामी निर्वाचनलाई लक्षित गर्दै कम्युनिस्ट मतदातालाई एकजुट हुन अपिल गरेका छन्। सामाजिक सञ्जालमार्फत धारणा सार्वजनिक गर्दै उनले नेपालमा बामपन्थी–कम्युनिस्ट मतको आधार बलियो भए पनि विभाजनका कारण कमजोर देखिएको बताएका छन्।
उनले विगतका निर्वाचन परिणाम स्मरण गर्दै माओवादीको आकार बढ्दा एमाले कमजोर भएको र एमाले बलियो हुँदा माओवादी कमजोर बनेको उल्लेख गरे। दुवै शक्ति एक हुँदा झण्डै दुई तिहाइ बहुमत नजिक पुगेको उदाहरण दिँदै उनले कम्युनिस्ट मत अन्ततः कम्युनिस्ट पार्टीभित्रै सीमित रहनु सकारात्मक पक्ष भएको दाबी गरे।
तर, यसपटक मतदाताले ‘परिवर्तन’को नाममा बुर्जुवा पार्टीतर्फ मत सार्ने हो भने दीर्घकालीन रूपमा बामपन्थी शक्तिहरू कमजोर हुन सक्ने उनको भनाइ छ। “कम्युनिस्ट मत बुर्जुवा पार्टीमा स्थायी रूपमा पलायन हुन सक्छ, जसले आगामी निर्वाचनमा बामपन्थी शक्तिहरू रक्षात्मक अवस्थामा पुग्न सक्छन्,” उनले उल्लेख गरेका छन्।
गुरुङले मतदातालाई आ–आफ्नो पार्टीप्रति असन्तुष्टि भए पनि मत कम्युनिस्ट धाराभित्रै राख्न आग्रह गरेका छन्। उनले ठ्याक्कै रूपमा सबैलाई एमालेको सूर्य चिन्हमा मतदान गर्न अपिल गर्दै, त्यहाँ पनि चित्त नबुझेमा नेकपाको तारा चिन्हमा मतदान गर्न सुझाव दिएका छन्। अन्य पार्टीमा मत नहाल्न उनले आग्रह गरेका छन्।
उनको यो अभिव्यक्ति सामाजिक सञ्जालमा व्यापक रूपमा चर्चा भइरहेको छ।